بلوچستان ءَ لاشانی درگیجگ برجاہ اِنت دگہ دو بیگواھیں مردم کشگ بیتگ انت-
بلوچستان ءِ دمگ کیچ ءِ تھسیل تربت ءِ دمگ ھوشاپ ءَ پولیس یک مردمے ءِ تیر ءِ آماچیں لاش دزکپتگ ءُ نادراھجاہ ءَ سر کتگ۔ آئی ءِ پجار شریف ء چنگیز ءِ نام ءَ بوتگ۔
بیران بوتگیں مردم گوستگیں روچ ءَ ناشناسیں سلاہ بندیں مردماں موٹر سائیکل ءِ سر ءَ آوار جتگ ءُ گوں وت برتگ ءُ رند ءَ تیرگواری کتگ ءُ کشتگ۔
اے وئیل ءِ ھلاپ ءَ زھرشانی ءَ بیران بوتگیں مردم ءِ کھول ءَ لاش ءِ ھمراھی ءَ گوادر، تربت ءُ شال ءِ راہ ھمک وڑیں ٹرپک ءِ ھاتر ءَ بند کتگ کہ ایشی ءِ سبب ءَ راہ ءِ دوئیں نیمگاں گاڑیانی دراجیں لین جوڑ بوتگ اَنت۔
دومی نیمگ ءَ پنجگور ءَ لاشانی دزکپگ ءِ درچ بند نہ بوت، مرچی رخشان کور ءَ دست کپتگیں لاش ءِ پجار شاہ جھان ء رھمت اللہ جھمنند کلات ءِ نام ءَ بوتگ۔
زانگ بہ بیت کہ گوستگیں دو ماہ ءَ پنجگور ءَ ھمک روچ لاشانی دزکپگ ءِ یک دود ءُ ربیدگے جوڑ بوتگ۔ یک ھالے ءِ رد ءَ گوستگیں دو ماھانی تہ ءَ جتا جتائیں جاھاں اے وڑیں بیست ءُ دو لاش دست کپتگ انت کہ یا بیگواہ کنگ ءُ کُشگ بوتگ اَنت یا تیر گواری ءَ پد ھما جاہ ءَ بیران بوتگ اَنت۔
زانگ بہ بیت کہ پنجگور ءُ بلوچستان ءِ دگہ دمگاں دست کپتگیں گیشتریں لاشانی پجار ھما انت کہ آ پیسر ءَ چہ پاکستانی لشکر یا دمگی ڈیتھ اسکواڈانی نیمگ ءَ زورانسری ءَ بیگواہ کنگ بوتگ انت ، وھدے کہ پنجگور ءُ کیچ ءَ ٹارگٹ کیلنگ ءِ وئیل ھم گیش بوتگ انت ۔
بلوچ یکجھتی کمیٹی ءَ پنجگور ءَ انوگیں وھد ءَ بلوچ ورناھانی کوش تُرندی ءَ ایر جتگ ءُ گْوشتگ کہ بلوچستان ءَ زورانسری بیگواہ کنگ، درکانودی کوش ءُ نشانگ جوڑ کنگ ءِ سلسلگ برجاہ اِنت ءُ چہ فروری ءِ بندات ءَ ایشی ءِ تہ ءَ گیش گیشی بوتگ۔