بلوچستان ءِ دمگ خضدار ءَ بمب تراکے ءِ آسر ءَ پاکستانی لشکر ءَ جانی تاوانانی دیمپانی کنگ کپتگ-
فورسز ءِ سر ءَ تراک خضدار ءِ کرخ ءَ بوتگ کہ آ دمگ ءَ پیادگ ءَ دیم ءَ روگ ءِ جھد ءَ بوتگ اَنت۔
دمگی مردمانی رد ءَ تراک ءِ آسر ءَ لشکر ءَ تاوان رس اتگ بلے انگت ءَ واکداراں اے درگت ءَ دگہ ھال ءُ اھوال نہ داتگ انت۔
زانگ بہ بیت مرچی سیمی روچ انت کرخ ءِ دمگ ءَ سی پیک ءِ راہ ءَ بلوچ آجوئی لوٹوک وتی کنٹرول ءَ برجاہ دارگ ءَ انت۔ چمدیستگیں مردمانی گشگ ءِ رد ءَ آجوئی لوٹوکاں جتاجتائیں جاھاں چیک پوائنٹ جوڑ کتگ اَنت وھدیکہ سنیپ چیکنگ بوھگ ءَ اِنت۔
دمگ ءِ نندوکیں مردمے ءَ ٹی بی پی ءَ گوں تران کنان ءَ گْوشتگ کہ گوستگیں روچ ءَ پورسز ءَ وتی پوسٹاں بازیں مارٹر آس داتگ انت کہ آ جتا جتائیں جاھاں کپتگ اَنت بلے سی پیک ءِ راہ انگت آجوئی لوٹوکیں مردمانی دست ءَ اِنت۔