بلوچ یکجھتی کمیٹی ءَ گشتگ پنجگور ءَ ریاستی کمک ءَ ھستیں سلاہ بندیں گل ءُ فرنٹیئر کور ءِ کارندھانی نیمگ ءَ زورانسری بیگواہ کنگ ءُ درکانودی ءِ کشگ ءِ گیشتر دلپدردی ءِ وئیل دیم ءَ اتکگ انت کہ ایشی ءِ تہ ءَ دو بلوچ کسان سالیں ورنایانی لاش دست کپتگ انت۔
گل ءِ رد ءَ یحییٰ بلوچ ء فضل کرہم 17 سالی نودربرے بیتگ 3 مارچ 2026 ءَ چہ آئی ءِ لوگ ءَ خدا آبادان ءَ فرنٹیئر کور ءِ کارندھانی ھمراھی ءَ سلاہ بندیں مردماں چست کتگ ءُ نہ کہ کارندھانی نیمگ ءَ ناں دگہ وارنٹ پیش کنگ نہ بیتگ ءُ نہ کہ آئی ءِ سر ءَ دگہ بھتام جنگ بوتگ انت۔
پد ءَ یحییٰ بلوچ ءِ جون پنجگور ءَ ایف سی کیمپ ءِ نزیک ءَ دزکپتگ بوتگ۔ اے دل سودیں وئیل ءَ آئی ءِ لوگ ءِ مردم سک ابکہ ءُ گمگین کتگ انت۔ یحیی یک کسانیں نودربرے ات کہ آئی ءِ دیم ءَ وشیں بانداتے ءِ واھشت ات انت، بلے پہ زور بیگواہ کنگ ءَ پد کشگ بوت۔
گل ءِ رد ءَ دومی وئیل چہ پنجگور ءَ ھم پدر بوتگ کہ اود ءَ یک اکتوبر 2025 ءِ شپ ءِ 7:35 ءَ ڈرائیور ءُ پنجگور ءِ دمگ پروم ءِ نندوکیں یحییٰ بلوچ ء نور محمد چہ پنجگور ءِ ائیرپورٹ روڈ چتکان ءَ زورانسری ءَ بیگواہ کنگ بوتگ۔ آئی ءِ سیادی چہ گریبیں کھولے ءَ بیتگ ءُ کسانیں اُمر ءَ وتی کھول ءِ زمہ واریاں پیلو کنگ ءَ بیتگ۔
شش ماہ ءَ آئی ءِ لوگ ءِ مردم گوں زھر ءُ بے وسی ءَ آئی ءِ واتر بوھگ ءِ ودار کُت۔ بلے آئی ءِ لاش 3 مارچ 2026 ءَ پنجگور ءِ دمگ وشبود ءَ دزکپتگ۔
درشان ءِ تہ ءَ گْوشگ بیتگ کہ اے وئیل بلوچستان ءَ برجاھیں انسانی ھکانی سنگینیں جیڑہ ءِ درشان اَنت کہ اود ءَ زورانسری ءَ بیگواہ کنگ ءُ درکانودی ءَ کوش برجاہ اِنت۔ رمضان ءِ پاکیں ماہ ءَ ھم بلوچ ءِ کھول ھم زورانسری بیگواھی ءُ وتی دوستیں مردمانی کوش ءِ وڑیں وئیلانی آماچ اَنت۔