بندیگ جاہ ءَ کوش ءِ سیاست
ٹی بی پی شونگال
بلوچستان ءَ وھدیکہ آجوئی ءِ واستا پرکاریں سلاہ بندین ادارہ پاکستانی پوج ءَ تاوانانی دیمپان کن انت گڑا پاکستان ءِ سیکیورٹی ادارہ وتی دودمانی رنگ ءَ پیش ءَ زورانسری بیگواھیں مردمان گمانی رنگ ءَ درکانودی کُش انت ءُ سلاہ بندیں جنگ ءِ نام ءَ دے اَنت- بلوچ لبریشن آرمی ءِ آپریشن ھیروپ ءَ تاوان چِست کنگ ءَ پد بلوچستان ءُ سندھ پولیس ءَ کراچی، بارکھان، پنجگور ءُ شال ءَ بیست ءُ ھپت (27) زورانسری بیگواھیں مردم کشتگ ءُ آ سلاہ بند نامینتگ انت، چُشکہ ھمدان بلوچ پیش ءَ سندھ ھائی کورٹ ءَ پیش کنگ بیتگ ءُ ھما روچ ءَ کُشگ بیتگ ھما روچ ءَ آئی ءِ آمیدگسی پیشی بیتگ-
بلوچستان ءَ چہ دو دھکاں بلوچ ورنا درکانودی کشگ بوگ ءَ انت ءُ نی ریاست مُچانکی سزا ءِ رنگ ءَ آیانی کھولاں ھم زورانسری بیگواھی ءِ آماچ کنگ ءَ انت- ھمدان بلوچ سندھ پولیس ءِ بندیگجاہ ءَ بیتگ ءُ دوبر آ سندھ ھائی کورٹ ءَ پیش کنگ بیتگ – ایشی ءَ ابید آئی ءَ نا ایوک ءَ سلاہ بندین جنگ ءُ چوپ ءِ کوش ءِ ٹاپار ءَ جنگ ءَ انت بلکیں کھول یکشل ءَ ترسینگ ءُ بے توار کنگ ءِ جھد بوگ ءَ انت-
پاکستانی پوج ءُ آئی ءِ ڈیھ ءِ مزن واکداریں اداری بلوچ ورنایاں یک شوربندی ءِ رنگ ءَ کُشگ ءِ امل یک دراجیں وھدے ءَ برجاہ انت- فروری ءِ ماہ ءَ بیست ءُ ھپت زورانسری بیگواھیں مردمانی کوش، بلوچستان ءَ اے رنگیں اولی ویل نہ انت بلکیں زورانسری بیگواھیں مردمانی درکانودی کوش یک دھکے ءَ گیش یکشل ءَ برجاہ انت- بلوچستان ءَ رسانکدر ءِ بندش ءُ ریاستی ترندیانی سبب ءَ بس لھتت وئیل دنیا ءِ دیم ءَ کاینت بلے اے وھد ءَ بلوچستان یک سنگینیں انسانی ناوشی ءِ دیمپان انت-
پاکستان ءِ مزن واکداریں تاکت سرپد بوگ ءَ انت کہ زورانسری بیگواھی، ریاستی زوراکی، مچانکی سزا ءُ بندیگجاھی کوش آ بلوچ انسرجنسی ءَ ھلاس کنگ ءَ انت بلے بلوچستان ءِ راستی تچک انت کہ اے ریاستی پالیسیاں بلوچ ءُ پاکستان ءِ ریشگ گیش نیزور کنگ ءَ انت- ھمدان بلوچ ءِ مات ءُ ریاستی زوراکیانی آماچیں مات مچانکی زوراکی بلوچستان ءَ ریاست ءِ اُنڈالاں سِندگ ءَ انت اے پکر ءَ بلوچ راج ءِ مچانکی یاداشت ءِ بھر بوگ ءَ انت کہ پاکستان ءَ بلوچ راج ءِ پدریچ ممکن نہ انت-