پسنی، ھاران ءُ دشت ءَ پاکستانی پوج ءِ چیک پوسٹانی سر ءَ اُرشاں پنچ کارندھانی کوش ءُ زامران ءَ پوج ءِ راشن ءِ دستیگ کنگ زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست چار فروری ءَ پسنی ءِ دمگ کلانچ ءَ ڈوکانی ءِ ھند سر ءَ برجاہ پاکستانی پوج ءِ چیک پوسٹ ءِ سر ءَ دو نیمگی ءَ چہ مزنیں سلاھاں چہ اُرش کتگ- سرمچاراں اے کاروائی سکا نزیک ءَ چہ کتگ چریشی ءِ آسر ءَ پنچ پوجی کارندہ مرتگ ءُ بازین ئِے ٹپی بیتگ اَنت-

جارکش ءَ گْوشتگ کہ یک کاروائی ءَ بی ایل ایف ءِ سرمچاراں ھاران شھر ءَ گزّی دگ سر ءَ برجاہ پوجی چیک پوسٹ سر ءَ گرنیڈ لانچر ءَ چہ گولہ آس داتگ کہ وتی نشانگ ءَ کپتگ اَنت- اے کاروائی ءِ آسر ءَ پوج ءَ جانی ءُ مالی تاوان چست کنگ کپتگ-

جارکش ءَ گوشتگ کہ بی ایل ایف ءِ سرمچاراں بیست پنچ فروری ءَ یک کاروائی یے دشت ءِ دمگ سنگائی ءَ سی پیک دگ سر ءَ برجاہ پاکستانی پوج ءِ چیک پوسٹ سر ءَ اُرش کتگ- اے چیک پوسٹ دمگی گاڑیانی چاروگی ءِ ھاتر ءَ برجاہ دارگ بیتگ کہ مھلوک ءَ را تنگ کنت- اُرش ءِ میان ءَ سرمچاراں پوجی چیک پوسٹ سر ءَ بازیں راکٹے آس داتگ کہ وتی نشانگ ءَ کپتگ- اے کاروائی ءِ آسر ءَ پوج ءَ جانی ءُ مالی تاوان چست کنگ کپتگ-

جارکش ءَ گوشتگ ھمے روچ ءَ دگہ یک کاروائی یے سرمچاراں زورگریں پوج ءِ راشن بروکیں یک گاڑی یے زامران دمگاں نوانو ءُ گیشتردان ءِ میان ءَ گپتگ – اے گاڑی ءَ دُژمنیں پوج ءِ واستا وردن ساماناں ھوار آ دگہ سامان ءُ اژدری سامان دستیگ کتگ اَنت-

گُڈی ءَ بی ایل ایف ءَ سرجمیں کاروائیانی زمہ واری منّ اِتگ اَنت-