موبائل ءِ آسراتی ءُ بلوچی
نبشتہ کار: ھانی بلوچ
دی بلوچستان پوسٹ
مرچاں چہ موبائل ءِ آستراتی ءَ یسبوک، وٹس ایپ ءُ دگہ شوشل میڈیا پترانی برکت ءَ دُنیا ءِ بازیں گلامیں راجانی زبان دیمروی کنگ ءَ اَنت۔ بلے سک بژن اِنت کہ مئے راج ءِ وانِندہ پیسبوک ءُ آدگہ شوشل میڈیا پتراں اردو ءُ پارسی ءَ ھوار دری زباناں نبشتہ کن اَنت۔ ما وتی جِند ءِ بلوچی زبان ءَ شموشان ءُ لگتمال کنان ءَ پیسبوکی پوسٹ، کلوہ ءُ دِگہ نبشتھاں پارسی ءُ اردو ءَ نبیسگ ءَ ایں۔
گِند ئے ما منّ ایں کہ ماں اسکول، کالج ءُ کارجاھاں ھِندی ءُ پارسی ءِ وانگ، نبیسّگ ءُ کارمرز کنگ مئے راج ءِ یک بے وسی ءُ مجبوری یے بلے وتی دزھُورکی وھد ءُ ماں شوشل میڈیا ءَ وتی کلوہ ءُ پوسٹاں ماں ھِندی ءَ نبیسّگ مئے مجبوری یے وَ نہ اِنت بلکیں ماں پیسبوک، وٹس ایپ ءُ دِگہ شوشل میڈیا ءِ پتر ءَ دری زُباناں، ھاس پارسی ءُ ھندی نبیسّگ ءُ پوسٹ کنگ مئے مجگی گُلامی ءِ یک ٹوھیں نشانی یے۔ گُڑا باید اِنت ما یک ھپتگے ءَ بلوچی دَرونتاں وانان ءَ بلوچی وانگ ءُ راست نبیسگ ءِ جُھد بہ کن ایں کہ مئے زبان ھم ماں ڈجیٹل دنیا ءَ دیمروی بکنت۔
باید اِنت ما وت ءَ دلپروش ءُ دلگران مہ کن ایں، پْروش مہ ور ایں کہ من وانگجاھاں بلوچی نہ ونتگ پمیشکا انی من ھچ نہ زان آں یا من بلوچی نبیسّگ ءَ سُست آں بلکیں ما ھر یکے وت ءَ راجی زُبان ءِ مُھکمیں سرمچارے جوڑ بہ کن ایں۔ ما بلوچی وت بِہ وان ایں ءُ راج ءَ ھم بلوچی وانینگ ءِ جُھد بہ کن ایں۔ بزانکہ شما بلوچی دَرونت ءُ راجدوستی نبشتانک وانان بہ کن اِت دیم ءَ وھد ءِ ھمراھی ءَ وت زبر بَہ اِت۔ پد ءَ پہ گلامیں راج ءِ آگاھی ءُ پہ دژمن ءِ ھلاپ نپرت ودی کنگ ءَ مُدام آشوبی نبشتہ ءُ آزمانکاں نبیس اِت پرچا کہ شُمارا گُلامی ءُ دژمن ءِ زُلم ءُ زورانسری ءِ ھلاپ نبیسگ ءُ دژمن ءِ ھلاپ ءَ نپرت ودی کنگی اِنت۔
پہ اِے سِلیں گلامی ءِ پْروش دیگ ءَ ما بلوچ زالبولاں دیم ءَ آیگ لوٹ ایت پرچا کہ بے زالبول ءِ بھر زُورگ ءَ دنیا ءِ ھچ جُنز، راجی آشوب ءُ آجوئی ءِ جُھد سوبین نہ بوتگ اَنت۔ ایشی ءِ سبب ایش اِنت کہ زالبول راج ءِ نیم بھر اِنت پمیشکا راجی آشوب ءُ بلوچ آجوئی ءِ جنگ ءَ بلوچ زالبولاں ھم بھر زُورگ لوٹ ایت۔گْوشگ ءِ مُراد تھنا ایش اِنت کہ وت ءَ زبان دوست ءُ راجدوست جوڑ بکن اِت، شمارا راج ءِ تہ ءَ زانت ءُ سرپدی ودی کنگی اِنت کہ بلوچ یک جُتائیں راجے ءُ ما گوں پنجابی ءَ ھچ وڑیں ادی ءُ نزیکی نہ دار ایں، بلوچ ءِ وتی جتائیں سرڈگار، رواج ءُ شاھگانیں زُبان ھست اَنت پمیشکا ما وتی ڈیھ ءِ آجوئی ءُ وتواجھی ءَ لوٹ ایں۔
گُڑا باید اِنت بلوچ راج پہ وتی پجّار ءُ ھستی ءِ واست ءَ یکجاہ، ھمکوپگ ءُ یکمُشت بہ بیت۔ اِے درگت ءَ بلوچ زالبولاں وتی راجی زمہ واری ءُ کِرد دلگوش کنگی اَنت۔ ھاس ما گوں کالج ءُ یونیورسٹی ءِ نودربراں دزبندی کن ایں کہ شما راج ءِ اُمیت ءُ باندات ءِ رھشون اِت۔ وتی موبائلاں پہ زبان ءُ راجدوستی ءَ کارمرز بکن اِت۔ چہ دُرستاں پیسر بلوچی دربرگ ءِ جُھد بہ کن اِت، مُدام گوں بلوچی اُستاداں رھوت بہ کن اِت کہ آ شمارا شریں بلوچی دَرونت ءُ سرپدی دیوکیں نبشتانکاں راہ بِدے اَنت۔
شالا راج ءِ وانِندہ راجی زبان ءِ سرمچار ءُ جُھدکار جوڑ بات اَنت، بلوچ راج شالا تپاک، یکمُشت ءُ ھمدست بات، راج ءِ نودربر شالا زُبان دوست ءُ راجدوست بات اَنت۔ بلوچی ءُ بلوچستان شالا دیمروی بکنات۔