بلوچستان ءِ دمگ پنجگور ءَ گوستگیں شپ ءَ زورانسری آوار جنی ءِ نشانگ بیتگیں یک ورنایے پاکستانی پوج ءَ کشتگ-
کھول ءِ رِد ءَ اویس احمد بلوچ نامیں ورنایے گوستگیں شپ ءَ دگہ مردمانی ھمراھی ءَ دزگیر کنگ بیتگ- دمگی اِھوالکار ءِ رِد ءَ اے کاروائی پنجگور ءِ دمگ خدابادان ءَ کنگ بیتگ، اود ءَ بازیں لوگانی سر ءَ بیڑبرتگ-
کھول ءِ مردمانی گوشگ اِنت کہ اویس احمد گوں سے براتاں ءُ دگہ یک ورنایے ءِ ھمراھی ءَ آوار جتگ اَت – بیگواہ کنگ بیتگیں دگہ مردمانی پجّار بختیار ء حاجی محمد حسن، عرفان ء حاجی محمد حسن بلال ء حاجی محمد حسن ءُ حسن ء خلیل ناماں چہ بیتگ اَنت-
کھول ءِ رِد ءَ بختیار، عرفان ءُ بلال وت ماں وت ھکگیں برات اَنت-
دمگی اِھوالکار ءَ ٹاہ داتگ کہ کاروائی ءِ میان ءَ تیرگواری ھم کنگ بیتگ، چریشی ءَ اویس احمد ٹپی بیتگ – کھول ءِ گوشگ اِنت کہ آ ٹپی ئیں جاوراں گوں پوج ءَ وتی ھمراھی ءَ برتگ اَت – نو ھال اِنت کہ اویس احمد ءِ کُشگ ءَ پد آئی ءِ لاش دور داتگ-