بی ایل اے ءَ آپریشن ھیروپ دومی بھرگ ءَ ھوار دگہ یک شھید بیتگیں سرمچارے ءِ اکس ءُ اِھوال شنگ کتگ اَنت

بلوچ لبریشن آرمی ءَ ھکل میڈیا چہ آپریشن ھیروپ دومی بھرگ ءَ ھوار دگہ یک شھید بیتگیں سرمچارے ءِ اکس ءُ اِھوال شنگ کتگ اَنت-

ھکل میڈیا رِد ءَ شھید محمد دین مری پنّام ءِ وحید قائم خان مری جھمنند بادرہ لاکی، سانگان سبی ءَ بی ایل اے 2022 ءَ ھمگرنچ بیتگ –

آئی ءَ گوشتگ کہ شھید محمد دین مری جنگ آجوئی ءِ انچیں سرمچارے بیتگ کہ آئی ءِ کھول ءَ وت دیمونی ءُ دلیری ءِ یک زندگیں نشانی یے – آئی ءِ دو برات، فدائین ازل پنّام ءِ ڈاڈا ءُ شھید محمد حسین پنّام ءِ جبل ،اشی ءَ ساری آجوئی ءِ راہ ءَ شھیدی نوش ءِ کتگ، چوش کہ یکیں کھول ءِ سے رُژن ءِ چراگ سرڈگار ءِ ھاتر ءَ نمیران بیتگ اَنت- اے گرانبھائیں ربیدگ ءَ آئی ءِ جزم نزور نہ کتگ بلکیں آ گیش مھکم زوراور جوڑ کتگ، ءُ آ اے امانت ءَ را گُڈی ساہ ءَ تاں پیلو کنگ ءِ ھاتر ءَ مھکم بیتگ-

ھکل میڈیا ءِ رِد ءَ شھید محمد دین مری جنگ ءِ میدان ءِ ماھر، کوھاں چہ آشنا اَت تُرندیں جاورانی آدی بیتگ -بلوچستان ءِ کوہ آئی ءِ واستا پناہ جاہ ھم بیتگ اَنت ءُ ھیلکاری جاہ ھم، اود ءَ آئی ءَ اوپار، سبر ءِ ھُنر دربرتگ- وتی جنگی رپک، بے تواری پیش گامی ءُ دُژمن ءِ سر ءَ اُرش کنگ لائک ءِ سوب ءَ آ گل ءَ ھوار بیگ ءَ پد کمی وھد ءَ ‘ فتح اسکواڈ’ ءِ بھر جوڑ بیتگ-

ھکل میڈیا رِد ءَ آئی ءَ بولان، شال ءُ مستونگ ءِ جنگ ءِ ھرچ میدان ءَ دیم ءَ بیتگ ءُ دُژمن ءَ را پروش دیگ بلاھیں کردے پیلو کتگ- جنگی میدان ءَ آئی ءِ ھوسلہ ھچبر پشت نہ بیتگ، ءُ آ گُڈی وھد ءَ تاں اوشتگ، ھمت ءُ مھکمی ءِ رُژن ءِ مسال جوڑ بیتگ ءُ جنگ ئِے کتگ-

آئی ءَ گوشتگ کہ شھید محمد مری آپریشن ھیروپ دومی بھرگ ءَ مستونگ ءِ جنگ میدان ءَ ساڑی بیتگ، اود ءَ آئی ءَ دیم پہ دیمی جنگ کنان ءَ نمیرانی وتی نام ءَ کتگ-