یونائیٹد نیشن (UN) ءِ پنچ گچینی نمائندگاں پاکستان سرکار ءِ سرا نمدی نبشتگ ءُ نامداریں انسانی ھکانی وکیل ایمان مزاری ءُ ھادی الی چھٹہ ءِ بگیری ءَ برجاھیں پوجی کاروائیانی سرا پدردی درشان اتگ ۔ آیاں گوشتگ کہ اشانی سرا جنگ بوتگیں بھتام ھاسکر ”سائبر دھشتگردی“ سرزاھر ءَانسانی ھکانی کانودی کمک ءُ آزاتیں درشاندابی ءَ چیرترینگ ءِ ھاتر ءَ کارمرز بوگ ءَ انت ۔
نمدی ءِ سرا جج ءُ وکیلانی آزاتی ، آزاتیں درشاندابی ، ایمنیں زھرشانی ءُ گل سازی ، انسانی ھکانی پھازدار ، ءُ انسانی ھک ءُ انسداد ءُ دھشتگردی ءِ درگت ءَ گچینی نمائندگانی دزنشان ھوار انت ۔
ھردو وکیل 24 جنوری 2026 ءَ پاکستان ءِ الیکٹرانک کتکاری ءِ گرءُ داری ءِ ایکٹ ( PECA) 2016 ءِ دپہ 10 ،9 ءُ 26 اے ءِ رد ءَ کتکار گوشتگ ءُ 17 سال بندیگی ءِ سزا داتگ انت ۔ درساں گیشتریں سزا 10 سال ئے بزاں (سائبر دھشتگردی ) ءِ بوتگ ۔ اشی ءَ ابید ھر یکے ءِ سرا 3 کروڑ 60 لک کلدار جرمانہ جنگ بوتگ ۔
یو این ءِ نمائندگاں اے گپ ءِ سرا پدردی درشانتگ کہ سائبر دھشتگردی ءِ تاریپ سک دراج انت ءُ بلے آ ھنچین سرا جنگ بوتگ کہ سر زاھر ءَ آیاں عوامی امور ءُ انسانی ھکانی درگت ءَ نگد کتگ ۔
یو این ءِ رد ءَ 2022 بگر تاں ھنو ایمان مزاری ءِ بگیری ءَ کم چہ کم دھ ارزی نبشتہ کنگ بوتگ بلے پدا ھم آئی ءَ ھچ ءِ سرا سزا نہ رس اتگ ۔ اے ارزیانی تہ ءَ زورانسری آوارجنیانی بگیری ءَ زھرشانی ، پوجی سروکانی سرا نگد ، ءُ انسداد دھشتگردی ایکٹ ءِ رد ءَ دزگیری ءِ وڈیں جیڑہ ھوار انت ۔