ھُزدار : لوگ واجہ دو چُکاں پد مات زورانسری بیگواہ کنگ بیتگ اَنت

پاکستانی پوج ءَ زالبول زورانسری بیگواہ کتگ، یکجاھی ھساپ ءَ کھول ءِ یازدہ مردم بیگواہ-

چہ ھُزدار ھالانی رِد ءَ پاکستانی پوج ءَ ھمے ماہ ھژدہ فروری ءَ بلوچستان ءِ دمگ چہ ھُزدار ءِ ھند گزگی ءَ لوگ سر ءَ بیڑبرتگ مشکے نوکجو ءِ جھمنندیں پیرزالیں حیات بی بی آوار جتگ-

حیات بی بی ءِ لوگ واجہ فضل کریم ءُ دو چُک نواز ءُ داد شاہ فضل جتاجتائیں وھداں چہ ھُزدار ءُ ھب چوکی ءَ زورانسری آوار جنی ءِ نشانگ کتگ اَنت-

ھالانی رِد ءَ اے اشی ءَ ساری فروری ءَ ھب ءَ پاکستانی پوج ءَ بیڑ میان ءَ اے کھول ءِ ھپت مردم ھم آوار جتگ ءُ ناشناسیں جاھے ءَ برتگ اَنت، آیانی تہ ءَ زالبول حیات بی بی ءِ ناکوزتک ءِ عبدالرب، محمد رحیم، عبدالرازق، عبدالمالک ءُ ناکوزتکانی چُک شاہ زیب، جھانگیر، شاہ میر ءُ نوروز ھوار اَنت-

یکجاھی ھساب ءَ اے کھول ءِ یازدہ مردم پاکستانی پوج ءَ آوار جتگ ءُ بیگواہ کتگ اَنت، آیانی درگت ءَ ھچ وڑیں ھال نیست-

زانگ بہ بیت کہ اے وھداں بلوچستان ءَ زورانسری آوار جنی یکرندے پد ءَ گوں تُرندی ءَ گندگ آیگ ءَ اِنت، اود ءَ بلوچستان ءِ جتاجتائیں دمگاں ھوار کراچی ءَ بازیں مردم بیگواہ بیگ ھال دزکپتگ-

زورانسری آوار جنی وئیلانی سر ءَ ھیومن رائٹس کمیشن، بلوچ یکجھتی کمیٹی ءُ بیگواھیں مردمانی کھول ءِ گل وائس فار بلوچ مسنگ پرسنز ءَ تُرندیں دلپدردی درشان اِتگ ءُ پاکستان ءَ چہ شھریانی ھلاپ آسری کاروائیانی دارگ ءُ بیگواہ مردمانی یل کنائینگ لوٹ کتگ-