دولت بلوچ ڈیتھ اسکواڈ ءَ نشانگ کتگ کُشتگ- بی وائی سی

بلوچ یکجھتی کمیٹی ءَ گوشتگ کہ دولت بلوچ ء بدل جھمنند تجابان، یک گریب دھکنکاریں کھول ءَ چہ سیادی داشتگ بیتگ ءُ وتی بُنکی زمییناں کشتکاری ءَ کنگ ءَ بیتگ-

آئی ءَ گوشتگ کہ مارچ 2022 ءَ فرنٹیئر کور ءَ لوگ ء چہ بیڑبرتگ – دولت ءُ آئی ءِ دوازدہ سالی ئیں برات بیگواہ کتگ ءُ یک ماھے ءَ تاں ناشناسیں جاھے ءَ برتگ- یک ماھے ءَ آ یل کتگ، بلے زوراکی ءُ ناانساپی ءِ ساھگ آیانی زندمان ءَ چہ ھچبر ھلاس نہ بیتگ- دولت وتی ھمکروچی زند ءِ نیمگ ءَ واتر اتکگ بلے زُلم ءِ یات آئی ءِ ھمراہ بیتگ-

آئی ءَ دیمتر ءَ گوشتگ کہ ھژدہ فروری 2026 ءَ نیمروچ کساس دو ءَ وھدے آ لوگ ءَ واتر آیگ ءَ بیتگ کہ پرپٹ سواریں ڈیتھ اسکواڈ آ نشانگ کتگ ءُ بے دردی ءَ کشتگ-

آئی ءِ کھول سک تُرس ءِ زند گوازینگ ءَ اَنت ءُ وتی دوستناکانی پہ سلامتی یل کنائینگ چہ لاچار اَنت- آ جست کن اَنت: ما کجا بہ رو ایں؟ ما چون زندگ بہ بہ ایں وھدے ما وتی راج ءَ چہ مھر کنگ جرمے جوڑ کنگ بیتگ؟ نا انساپی تھنا دولت ءِ ھلاپ ءَ اناں بلکیں ھرچ بلوچ ءِ ھلاپ ءَ اِنت-

گُڈی ءَ گوشتگ کہ ما انسانی ھکانی کارکناں ءُ میان اُستمانی اداراھاں چہ زوت گامگیج لوٹ کتگ- زورانسری آوار جنی، دروگیں میڑ، درکانودی کوش ءُ ٹارگٹ کلنگ درچ بند کنگ لوٹ اِیت- بلوچ راج وتی سرڈگار سر ءَ آجوئی ءِ زند ءُ زُلم ءِ ھلاپ ءَ تواد چست کنگ ھک دار اِیت-