مات ھوری ءِ درد
ٹی بی پی شونگال
مات ھوری ءِ سرجمیں زند ریاستی زوراکیانی ساھگ ءَ گوستگ – مار ھوری ءُ آئی ءِ کھول ھما ھزاراں بلوچ باھوٹیاں ھوار بیتگ کہ 1973/77 ءَ ذولفقار علی بھٹو ءِ سرکار ءِ وھد ءَ بلوچستان ءِ دمگ کوھلو، کاھان ءُ سبی ءَ ھونریچیں پوجی آپریشن ءِ وھد ءَ ریاسری زوراکیانی سبب ءَ وتی ھند ءَ لڈ ءُ بار اش کتگ ءُ اوگانستان ءَ بازیں سالاں درانڈیھ بوتگ انت – مات ھوری ءِ کھول ءُ مری ٹک پاکستان ءِ زیاالحق ءِ پوجی زوراک ءَ پد نوزدہ سد ءُ نود ءِ دھک ءَ بلوچستان ءَ واتر بوتگ انت ءُ شال ءَ کوہ چلتن ءِ دامن ءَ نیوکاھان اش آباد کتگ ءُ ھمود ءَ جھمنندی بیتگ انت-
بیست ءُ یکمی کرن ءَ بلوچ انسرجنسی ءِ بندات ءَ ھم نیوکاھان ءِ جھمنند ریاستی برانز ءِ آماچ انت- بلوچ رھشون خیر بخش مری ءِ دزگیری ءِ ھمراھی ءَ یازدہ جنوری دوھزار ءَ نیوکاھان ءَ یک سد ءُ پنجاہ ءَ گیش جھمنندیں مردم دزگیری ءُ زورانسری بیگواہ کنگ بیتگ انت- دو دھکاں گیش گوزگ ءَ پد ھم نیوکاھان ءِ جھمنند زوراکیاں دمگ ءَ لڈ ءُ بار، مچانکی سزا، ریاستی زوراکی، زورانسری بیگواھی ءُ بندیگجاہ ءَ کوشانی دیمپانی کنگ ءَ انت-
مات ھوری ءِ زندگی زورانسری دمگ ءَ لڈ ءُ بار، ریاستہ زوراکیانی اوپار ءُ زورانسری بیگواھیانی ھلاپ ءَ جد ءُ جھد ءَ گوں بندوک انت- انساپ ءِ شوھازگ ءَ مات ھوری وتی پیری ءِ کوپگ ءِ یل کنائینگ ءِ ھاتر ءَ ریاستی بنجلاں ٹکان بیتگ ءُ وتی زھگ ءِ یل کنائینگ ءِ امیت ءُ ودار ءَ بے کساسیں درداں سگان ءُ اے دنیا ءَ رُکست بوتگ – بلے زورانسری بیگواھیانی ھلاپ ءَ اے پیرزالیں توار راجدپتر ءِ تاکاں ھچبر شموشگار نہ بیت انت-
بلوچستان ءَ ھزاراں زورانسری بیگواھی مات ھوری ءِ ءِ زھگ گل محمد مری ھم ھوار انت، آ دوھزار ءُ دوازدہ ءَ زورانسری بیگواھی ءِ آماچ کنگ بیتگ- زھگ ءِ یل کنائینگ ءِ ھاتر ءَ مات ھوری ھشتاد (80) سال ءِ اُمر ءَ پاکستان ءِ بنجاھی شھر اسلام آباد ءَ زھرشانی نندانک ءُ شال ءَ زھرشانی زرمبشتاں ھوار بیتگ- بلوچستان ءَ ھزاراں مات وتی زھگانی یل کنائینگ ءَ جد ءُ جھد ءِ دامن ءَ پھریزگ ءَ انت ءُ ریاست بلوچ ماتانی درد ءُ گمانی گیش کنگ ءَ زورانسری بیگواھیانی راستی ءَ انکاری انت-
بلوچستان ءَ سدانی مات ریاستی زوراکی ءُ مچانکی سزائی پالیسیاں اوپار کنگ ءَ انت ءُ مات ھوری ءِ وڑیں ماتانی ھمت ءَ چہ جد ءُ جھد برجاہ انت- مات ھوری وتی زھگ ءِ بازیں سالانی ودار، آئی ءِ زورانسری بیگواھی ءِ دردانی ھواری ءَ اے دنیا ءَ رکست بوتگ – بلے مات ھوری ءِ وڑیں بلوچ ماتانی درد مروچی ھم راج ءِ مچانکی زانشت ءِ بھر جوڑ بیتگ انت- چُشکہ بلوچ راج ءَ ریاست پاکستان ءِ ریشگ ءَ نیزور کنان کنت ءُ اے ھواریں راجی درد بلوچ سیاسی زانشت ءَ گیش کنگ ءِ سبب جوڑ بیت انت-