نوشکی : نامی ئیں شائر ابصار بلوچ ءِ بُنکی لوگ پاکستانی لشکر ءَ پروشتگ اَنت ، پت زورانسری بیگواہ کتگ، زالبول ءُ چُک لَٹ ءُ کُٹ کتگ اَنت

بلوچستان ءِ دمگ نوشکی ءَ پاکستانی پوج ءَ یک لوگے پروشتگ، اے میان ءَ زالبول ءُ چُکاں ھوار دگہ مردم لَٹ ءُ کُٹانی نشانگ کتگ ءُ نزیر احمد بادینی زورانسری بیگواہ کتگ-

نوشکی ءِ دمگ کلی شریف خان ءَ پاکستانی پوج ءَ چارشمبے ءِ روچ ءَ نزیر احمد بادینی ءِ لوگ ٹیکرٹر ءُ بلڈوزراں گون ءَ پروشتگ- نزیر احمد بادینی نامی ئیں شائر ابصار بلوچ ءِ پت اِنت-

دمگ مردمانی رِد ءَ اے میان ءَ پاکستانی پوج ءِ کارندھاں لوگ ءَ ساڑی ئیں زالبول ءُ چُکاں ھوار آ دگہ مردم لٹ ءُ کُٹانی نشانگ کتگ اَنت- جاڑیگیں رِد ءَ پوج ءِ کارندھاں زالبول تُپنگ ءِ کونداک جتگ اَنت-

نزیر بادینی ءِ یک ورنائیں چُک نامی ئیں فٹبال کھلاڑی بالاچ بادینی مئی 2024 ءَ سلاہ بندیں مردماں تیرگواری کتگ ءُ کُشتگ اَت – بالاچ بادینی ایشی ءَ ساری زورانسری آوار جنی ءِ نشانگ کنگ بیتگ- دمگی مردمانی رِد ءَ بالاچ بادینی پاکستانی چیریں ادارھانی چیردستی ءَ کارکنوکیں سلاہ بندیں ٹولی “ڈیتھ اسکواڈ” ءِ باسکاں کشتگ-

ایشی ءَ ساری پاکستانی پوج ءَ نوشکی ءُ گوادر ءَ بی ایل اے ءِ سروک بشیر زیب بلوچ ءَ ھوار دگہ سے مردمانی بُنکی لوگ ھم پروشتگ اَنت- اے لوگانی توک ءَ بلوچستان نیشنل پارٹی ءِ رھشون بھادر خان مینگل ءِ لوگ ھم ھوار اِنت-

بی ایل اے ءِ یکجاھی اُرش ءَ پد سرجمیں بلوچستان ءَ زورانسری آوار جنی ءُ دروگیں میڑاں وئیل گیشی گندگ اتکگ انت ھمے وڑ گوستگیں پانزدہ روچ ءِ میان ءَ 25 ءَ چہ گیش مردمانی لاش دزکپتگ اَنت آیانی تہ ءَ گیشتریں پجّار چہ پیسر ءَ بیگواھیں مردمانی ناماں بیتگ اَنت-