بارکھان ھسپتال ءَ شش آرگ بیتگیں لاش کہ آیانی درگت ءَ سی ٹی ڈی ءِ ٹاہ بیتگ کہ آ دیم پہ دیمی جنگ ءَ کُشگ بیتگ انت-
بلوچستان ءِ دمگ بارکھان ءِ ھالانی رد ءَ رکنی نادراھجاہ ءَ آرگ بوتگیں ششیں لاشانی تہ ءَ سئے لاش پجار کنگ بیتگ اَنت کہ ایشانی تہ ءَ جنوری دوھزار ءُ بیست ءَ جھل مگسی ءَ زورانسری آوار جنگ بیتگیں اکبر ء نواب خان ڈومکی، بڈھا ء محمد مراد لاشاری ءُ مکھن ء مرید لاشاری ھوار انت-
اکبر ء نواب خان ڈومکی پیسر ءَ 2022 ءَ وتی برات جوسپ ءِ ھمراھی ءَ زورانسری ءَ بیگواہ کنگ ءِ آماچ بوتگ ات کہ اود ءَ آئی ءِ برات جوسپ پد ءَ نصیر آباد نوتل ءَ دروگیں میڑ ےَ سی ٹی ڈی ءِ دست ءَ کشگ بیتگ۔
دوئیں براتانی زورانسری ءَ بیگواہ کنگ ءُ پد ءَ یک براتے ءِ جعلی انکاؤنٹر ءَ کُشگ ءِ راستی بلوچ بیگواھیں مردمانی سیاد ءُ وارسانی گل ”وائس فار بلوچ مسنگ پرسن“ ءَ اکتوبر 2022 ءَ کتگ ءُ اکبر 2020 ءَ زورانسری بیگواہ کنگ ءَ پد مرچی کُشگ بوتگ۔
رکنی ھسپتال ءَ آرگ بوتگیں دگہ سئے لاشانی پجار انگت ءَ پدر نہ بوتگ بلے ترس انت کہ اے ھم پیسر ءَ پہ زور بیگواھیں مردم بوت کن انت۔
یات بہ بیت کہ گوستگیں روچاں سی ٹی ڈی ءَ یک رندے پد ءَ جعلی انکاؤنٹر ءِ تہ ءَ پیسر ءَ دزگیر ءُ زورانسری ءَ بیگواہ کتگیں مردمانی کُشگ ءِ درچ گیش کتگ کہ ایشی ءِ تہ ءَ ایوک ءَ دو روچ ءِ تہ ءَ جعلی انکاؤنٹر ءِ تہ ءَ 18 مردم بیران بوتگ اَنت۔
گوستگیں روچ ءَ کراچی ءِ دمگ ملیر ءَ گمانی دیم پہ دیمی جنگ ءَ چار بلوچ ورنا بیران بوتگ اَنت کہ رند ءَ آ پیسر ءَ دزگیریں مردمانی پجار کنگ بوتگ اَنت۔ کراچی ءَ کشگ بوتگیں ھمے ورنایانی سیاد ءُ وارساں مرچی پریس کلب ءِ دیم ءَ زھرشانی کتگ ءُ پریس کانفرنسے ھم کتگ۔
ایشی ءَ ابید سی ٹی ڈی ءَ شال ءَ بوتگیں گمانی انکاؤنٹر ءَ 8 مردم بیران کنگ ءِ ھم ٹاہ داتگ۔