بلوچستان ءَ گمانی رنگ ءَ سلاہ بندیں گلانی باسکانی کھولانی سر ءَ ریاستی زور ءِ بھتام گیش بوتگ اَنت کہ گوستگیں روچاں بازیں سیاد ءُ وارساں چہ وتی نزیکیں مردماں جتائی ءِ درشان کنگ ءِ ھاترا پریس کانفرنس کنگ ءَ لاچار بوتگ اَنت۔ شال ءُ تربت ءَ ھوار جتا جتائیں شھراں برجم داشتگیں اے پریس کانفرنس انسانی ھکانی گلانی نیمگ ءَ مچانکی پالیسی ءِ برجاہ دارگ ءِ رنگ ءَ زانگ بوگ ءَ اِنت۔
مردمانی گْوشگ اِنت انوگیں سیکورٹی جاورانی درگت ءَ بلوچستان ءَ چار ءُ تباسی ءِ گامگیج گیش کنگ بیتگ اَنت۔ سرکاری لیکہ دیم ءَ اتکگ کہ سلاہ بندیں کارانی تہ ءَ ھوار بوگ ءِ وھد ءَ کھول ءَ ھم زمہ وار لیکگ بوت کن اَنت۔ لس مردمانی گشگ انت کہ اے لیکہ لس زمہ واری ءِ رھبنداں گوں بگیر کنت ءُ مچانکی سزا ءِ برابر انت کہ نہ ملکی قانون ءِ تہ ءَ ءُُ نہ کہ انسانی ھکانی میان اُستمانی رھبندانی تہ ءَ ھچ وڑیں لکیر کارے نیست۔
شال، کیچ ءُ ھب ءَ چہ اے وڑیں گمانی پریس کانفرنس کنگ بوتگ انت۔
انسانی ھکانی باسکانی گشگ انت کہ کھولانی لاچار کنگ ءَ چہ سرکاری بیان دیگ ءَ جاور گیشتر چپ بوت کن انت۔ ایشانی گشگ ءِ رد ءَ اے امل ءِ سبب ءَ کھول ءِ سر ءَ چاگردی، نپسیاتی ءُ زرکاری زور گیش بوگ ءَ اِنت ءُ زمین ءُ مال ءُ مڈی، روزگار ءُ دگہ شھری ھکانی چہ زبھر کنگ ءِ گمان بوتگیں ھترہ نوکیں ءُ ھترناکیں رھبندے ءِ نشانی اِنت۔
سانمندیں کھولانی گْوشگ انت کہ انوگیں جاوراں آ لاچار اَنت کہ آ ھما بیاناں بہ دنت کہ آ زاتی رنگ ءَ گوں آھاں تپاک نہ کن اَنت۔
زانتکارانی رد ءَ بی ایل اے ءِ آپریشن ھیروپ ءِ وھد ءَ لس مھلوک ءِ کمک بوتگ ءُ پاکستانی لشکر ءُ سرکار ءِ نیمگ ءَ سلاہ بندیں گلانی گمانی باسکاں پریس کانفرنس دیگ ءِ سر ءَ کنگ ءَ چہ ریاست ءِ ھلاپ ءَ گیشتر نپرت ءِ سبب جوڑ بیت۔
زانتکارانی گشگ انت کہ ھکومت ءِ نیمگ ءَ چہ ھانداناں چہ ھال ءُ اھوال ءِ دیم دیگ ءَ ھم سرجمیں سلاہ بندیں گلانی بابت ءَ ھال ءُ اھوال ءِ نہ بوگ ءِ بابت ءَ جُست چست کنگ بیت۔
یات بہ بیت کہ گوستگیں روچاں بی ایل اے ءِ آپریشن ھیروپ ءَ پد پاکستانی لشکر ءَ نوشکی ءُ گوادر ءَ کم چہ کم چار لوگ گوں تراک ءُ مزنیں مشینری ءَ تباہ کتگ اَنت۔ اے لوگانی تہ ءَ سیاسی گلاں گوں سیادی داروکیں مردمانی لوگ ھم ھوار انت۔
پد ءَ ٹپ ءُ ٹوریں لاشانی دزکپگ ھم گیشی بوتگ کہ پنجگور ءُ شال ءَ 9 لاش دست کپتگ کہ ایشانی تہ ءَ 5 لاش پیسر ءَ چہ زبردستی بیگواہ کنگ بوتگ اَنت۔