نوشکی کرفیو: بازار ءُ ٹرانسپورٹ ءِ بندی ءَ چہ مھلوک پریشان

رمضان ءِ آیگ ءَ چہ نوشکی شھر بیگاہ شش ءَ چہ سُھب نُھ ءَ تاں بازارانی بندی ءِ سوب ءُ مھلوک ءُ تاجراں سک دلسیاھی ءِ دیمپان- شھریانی گوشگ اِنت دبوج ءُ سھور ءِ وھداں سودائی نہ بیگ ءِ سوب ءَ ھمکروچی توژگ ءِ دزکپگ سانمند بیگ ءَ اِنت، وھدے کہ دکاندارانی رِد ءَ باپاری پُرکاری ءِ بند بیگ ءَ چہ آیاں مالی تاوان چست کنگ کپگ ءَ اِنت-

مھلوک ءُ تاجرانی لوٹ اِنت کہ رمضان المبارک ءِ شرپ ء چہ بازاراں مناسب ءِ وھداں تاں پچ کنگ ءِ موکل دیگ بہ بیت دانکہ شھری ارزانی ءَ سودائی کت بہ کن اَنت ءُ باپاری برجاہ بہ بیت-

دومی نیمگ ءَ نوشکی ءَ بیگاہ شش ءَ چہ سُھب نُھ ءَ ٹرانسپورٹ بندی ءِ سوب ءَ آر سی ڈی شھدگ سر ءَ سپر کنوکیں مساپر ءُ ٹرانسپورٹرزاں ھم سک دلسیاھی دیمپان – مساپرانی گوشگ اِنت سپری پابندیانی سوب ءَ آ وت منزل ءَ وھد ءِ سر ءَ نہ بنت، وھدے کہ ٹرانسپورٹراں مالی تاوان ءِ دیمپانی اِنت-

شھریاں، تاجراں ءُ ٹرانسپورٹراں چہ ھکومت ءَ لوٹ کتگ کتگ کہ لاک ڈاؤن ءُ سپری پابندیاں چارگ بہ بنت ءُ رمضان المبارکی بچار اَنت زوت کمک دیگ بہ بیت دانکہ ھمکروچی زند ءِ شر بہ بیت-

زانگ بہ بیت کہ شھر ءَ کرفیو ءِ جار شش فروری ءَ کنگ بیتگ- دمگی انتزامیہ ءِ رِد ءَ اے پیسلہ امن ءُ ایمنی جاورانی سوب ءَ کنگ بیتگ اَنت-

جار ءَ پد شھر ءِ جتاجتائیں دمگاں پوجی کارمند اوشتارینتگ اَنت وھدے کہ مزنیں شھدگ ءُ پُترگی ءُ ڈنی راھانی سر ءَ ناکہ بندی برجم داشتگ-

دیمتر ءَ واکدار ءَ کڈن کتگ کہ اشتاپی جاوراں اَبید در زروتیں سُر ءُ پُراں پھریز بہ کن اِت – کجام ھما۔ھلاپ ورزی ءَ چہ کانودی کاروائی کنگ ءِ ھال دیگ ھم بیتگ-

اے کرفیو یک انچیں وھدے جنگ بیتگ وھدے بلوچستان ءِ جاور سک ناگیگ بیتگ اَنت ءُ بلوچ لبریشن آرمی ءَ وتی کاروائی ءِ یک نوکیں بھرے ءِ جار جتگ اَت ” آپریشن ھیروپ دومی بھرگ ءِ نام داتگ-

بلوچ لبریشن آرمی ءَ 31 جنوری ءَ سرجمیں بلوچستان ءَ ” آپریشن ھیروپ دومی بھرگ ” بندات کنگ جار جتگ اَت، چریشی ءِ رِد ءَ آ بازیں شھراں یکیں وھداں اُرش کنگ بندات کتگ-