بلوچستان ءِ تیابدپی شھر پسنی ءَ سی ٹی ڈی ءِ کارندہ ءِ نیمگ ءَ شھری ءِ زمین ءِ سر ءَ گمانی رنگ ءَ زورانسری دستیگ کنگ ءِ ھلاپ ءَ سانمندیں مردماں پسنی پریس کلب ءَ سر بوتگ اَنت۔
پسنی ءِ وارڈ نمبر 7 ءِ نندوکیں حفیظ بلوچ، مبارک زہرو، قمبر طارق ءُ پیر محمد ءَ پسنی پریس کلب ءَ پریس کانفرنس کتگ ءُ بھتام جتگ کہ کاؤنٹر ٹیررازم ڈیپارٹمنٹ ( سی ٹی ڈی) ءِ یک کارندہے وتی ادارہ ءِ نام ءَ کارمرد کنگ ءُ یک گریبیں شھری ءِ پت ءُ پیروکی زمیناں دستیگ کنگ ءَ انت۔
آیاں گوشتگ کہ سانمند بیتگیں مردماں اے درگت ءَ تھسیلدار پسنی ءَ گوں ھم رھور کتگ، بلے آئی ءِ نیمگ ءَ چہ ھچ وڑیں املی گامگیج نہ بوتگ۔
پریس کانفرنس ءَ گوں گشتانک دیان ءَ آیاں گوشتگ سی ٹی ڈی ءِ مزنیں کارندہ ءُ ڈپٹی کمشنر گوادر ءَ چہ دزبندی کن ایں کہ آ سانمندیں مردماں انساپ بہ دنت ءُ گْوشگ بیتگیں کارندہ ءِ ھلاپ ءَ زوت کارروائی بہ کن اَنت۔
آیاں گیش گْوشتگ کہ آھاں ھم سی ٹی ڈی ءِ کارندہ ءِ نیمگ ءَ کشگ ءِ بیھار دیگ بوھگ ءَ اِنت۔ اگاں ایشاں ھرچ وڑیں تاوان رس ایت گڑا ایشی ءِ زمہ واری ھمگرنچیں ادارہ ءِ سر ءَ انت۔