نوشکی : کلی مینگل ءُ قادر آباد پاکستانی پوج ءِ انگیر ءَ اِنت، بیست ءُ دو مردم زورانسری بیگواہ

پاکستانی پوج ءَ لوگ لوگ ءَ پَٹ ءُ پول ءِ میان ءَ دمگی مردم لَٹ ءُ کُٹانی نشانگ کتگ اَنت، وھدے کہ دو درزنانی نزیک ءَ مردم آوار جنگ ءَ پد ناشناسیں جاھے ءَ برتگ اَنت-

چہ نوشکی ءَ ھالانی رِد ءَ پاکستانی پوج ءِ مزنیں کچے ءَ کلی مینگل ءُ قادر آباد ءِ دمگاں انگیر ءَ کتگ پٹ ءُ پول کتگ، چریشی ءِ میان ءَ بازیں لوگاں پُترتگ اَنت پروشت ءُ پروش کتگ ءُ دمگ مردم تُرسینتگ اَنت-

اِھوالکار ءِ رِد ءَ اے لشکر کشی ءَ کم چہ کم بیست دو مردم آوار جتگ اَنت پوج ءَ وتی ھمراھی ءَ ناشناسیں جاھے ءَ برتگ اَنت-

زانگ بہ بیت کہ گوستگیں بازیں روچ ءَ چہ نوشکی ءِ جتاجتائیں دمگاں پوجی لشکر کشی برجاہ، چریشی ءَ بازیں مردم آوار جتگ اَنت-

نوشکی ءَ بلوچ لبریشن آرمی اُرشاں ءُ شش روچ ءَ تاں شھر سر ءَ کنٹرول ءَ پد پاکستانی پوج ءَ آبادی ءِ ھلاپ ءَ مزنیں کچے کاروائی کتگ،کہ اود ءَ لوگانی تباھیں تامُر دیم ءَ اتکگ اَنت-

مروچی آوار جنگ بیتگیں مردمانی پجّار تنی وھدے نہ بیتگ گُڈی ھالاں تنی وھدے پاکستانی پوج ءِ انگیر ءَ اِنت-