بی ایل اے ءَ آپریشن ھیروپ ءَ ھواریں دگہ دو نمیرانیں سرانی اکس ءُ اھوال شنگ کتگ انت

بلوچ لبریشن آرمی ءَ وتی آفیشل چینل ھکل ءَ آپریشن ھیروپ ءَ بھر زیروکیں نمیرانیں دو سرمچارانی آکس ءُ اھوال شنگ کتگ انت-

بی ایل اے ھکل ءِ رد ءَ سرمچار ءِ پجار سیف جان سمالانی پنام ءِ عاجز ء باز مھمد سمالانی ءِ نام ءَ کتگ کہ آ گربوک بولان ءِ جھمنند انت نوشکی ءَ آپریشن ھیروپ ءَ نمیران بیتگ –

بی ایل اے ھکل ءِ رد ءَ سیف جان بی ایل اے ءَ سال دوھزار ءُ بیست ءُ دو ھوار بوتگ ءُ آئی ءَ پتھ اسکواڈ ءَ بھر زرتگ ءُ بولان ءُ کلات ءِ میداناں آ جاڑیگ بوتگ-

بی ایل اے ءِ رد ءَ سیف جان ءِ مات ھتم ناز سمالانی پنام ءِ گل بی بی ھم آپریشن ھیروپ ءَ نوشکی ءَ آپریشن ھیروپ دوم ءِ وھد ءَ فدائین بیتگ-

بی ایل اے ءِ رد ءَ سیف جان سمالانی پنام ءِ عاجز ھما ورنایاں ھوار بوتگ کہ آیانی گھگیری ردوم دشمن ءِ ساھگ ءَ نہ بیتگ بلکیں ماتیں سرڈگار ءِ کُٹ ءَ بوتگ- آ بولان ءُ کلات ءِ وڑیں ترندیں جاھاں فتح اسکواڈ ءِ یک مزن دلیں سرمچارے بیتگ- آپریشن ھیروپ ءِ دومی بھرگ ءَ آئی ءَ نوشکی ءِ پِڑ ءَ ترندیں جنگ ءُ چوپ ءِ وھد ءَ شھیدی وتی نام ءَ کتگ-

آئی ءِ رد ءَ آئی ءِ کربانی ءِ سرپد بوگ نا ایوک ءَ جنگ ءِ میدان انت بلکیں آئی ءِ مات فدائی ھتم ناز سمالانی بلوچ راجی جنگ ءَ ھما ماتاں ھوار بوتگ کہ آیاں نا ایوک ءَ زھگ جد ءُ جھد ءِ واستا رھادگ کتگ انت بلکیں وت فدائین بیتگ دشمن ءِ سر ءَ اُرش کنگ ءِ پیسلہ کتگ- دوھزار ءُ پانزدہ ءَ بی ایل اے ءَ ھوار بوتگیں ھتم ناز سال دوھزار ءُ شانزدہ ءَ دشمن ءِ یک آپریشنے ءِ وھد ءَ زدگ بوتگ،ءُ پد ءَ ریاست ءِ دست ءَ آوار جنگ بیتگ ءُ چار ماھاں بیگواہ بیتگ- جنوری دوھزار ءُ بیست ءُ سَے ءَ وتی اُمر ءِ شستمی بھرگ ءَ مجید بریگیڈ ءَ فدائین بوگ ءِ واک ءُ وتی ستک ءِ سر ءَ یک چیدگے ودی کتگ-

آپریشن ھیروپ گوستانک ءَ اے مات ءُ زھگ ءِ ھواریں شھیدی ءَ یک نوکیں تاکے پچ کنت- کہ اود ءَ ھردوکاں جتا جتائیں میداناں دشمن ءِ گون ءَ جنگ کنان ءَ یکیں وھشت سرجم کتگ ساہ داتگ- سیف جان ءِ شاھدی ءِ تیرگواری ءِ تواراں گوں بیتگ ءُ مات ءِ شاھدء فدائی ءِ بے تواری، یکے ءَ رائفل چِست کتگ ءُ دومی ءَ بارود ءُ ھردوکاں گُشت کہ آ درشان کنگ نہ بیت-

بی ایل اے ءَ دومی فدائین ءِ پجار ریجنل کمانڈر جعفر مینگل پنام ءِ کامریڈ سمیر ء محمد بخش مینگل جھمنند سریاب شال ءِ نام ءَ کتگ –

بی ایل اے ءِ رد ءَ آئی ءِ وانگی تک ایم اے سیاسیات ءَ بیتگ ءُ آئی ءَ سال دوھزار ءُ بیست ءُ دو ءَ بی ایل اے ءَ بھر زرتگ ءُ پد ءَ سال دوھزار ءُ بیست ءُ چار ءَ مجید بریگیڈ ءِ بھر بوتگ- آئی ءَ ساراوان ءُ رکشان، مجید بریگیڈ ءِ کمانڈری ءِ کرد پیلو کتگ- آ نوشکی ءِ میدان ءَ آپریشن ھیروپ دومی بھرگ ءَ پنچ فروری ءَ شھید بیتگ-

ھکل میڈیا ءِ رد ءَ کمانڈر جعفر مینگل ءِ سیادی شال ءِ دمگ سریاب ءَ بوتگ آئی ءَ گوشتگ سریاب ھنچیں جاھے کہ ماتانی دوا ءُ ورنایانی جستاں آباد انت- کمانڈر جعفر ھما ورنایاں چہ یکے بیتگ کہ آیاں سوال تھنا ایوک ءَ نہ کتگ بلکیں سیاست، چاگرد ءُ گوستانک ءَ ھم کتگ – اے سوالانی پسو تھنا کتابانی توک ءَ تپاوت نہ بیتگ بلکیں گچینی راھے ءَ گوں بیتگ-

سیاسیات ءِ گچینی وانگ ءُ زانگ ءَ ابید جعفر ءَ آ راہ نہ گپتگ کہ لس وانندگیں ورنایے گر انت بلکین جنگ ءَ را بستار ءِ سیاسی گام، یک شرپداریں زمہ واری ءُ پکری درشاندابے داتگ- ھمے سبب انت کہ بی ایل اے ءَ دو سال ءَ بندوکی ءَ پد آ زوت مجید بریگیڈ ءِ گچینی جاھاں کمان ءِ پھریزوکاں ھوار بوتگ- آئی ءِ سروکی ءَ ھمراھاں ستک، شونداتی ءُ دری رھبندانی پھریزی ءَ رسینتگ-

آئی ءَ گوشتگ آپریشن ھیروپ دوم ءِ وھد ءَ جعفر مینگل ءَ پنچ روچاں داں نوشکی ءَ درستاں گچینی جاہ نشانگ، آئی ایس آئی ءِ کارگس، ایف سی ءِ ھیڈکوارٹر، بس ءِ اڈہ ءَ ھیڈکوارٹر ءُ یکشلین جنگ کتگ- آ نا ایوک ءَ میدان ءَ جنگ ءَ بیتگ بلکیں سنگرے مٹ کنان کتگ ءُ ھمراھانی کمک ءَ سر بیتگ – آ اے پنچ روچاں جنگ ءُ آپریشن ءِ سرجمی ءَ پد واتری ءَ وتی ھمراھاں کور دیان بیتگ ءُ گڈی ءَ اوشتاتگ – اے امل تھنا لشکری شوندات نہ بیتگ بلکیں ھما شرپداریں کرد بیتگ کہ وتی مردماں بیت کہ جد ءُ جھد ءَ زاتی پکر ناں بلکیں راجی پکر –

فدائی جعفر ءِ شھیدی ھما ساھت ءَ بوتگ کہ آئی ءَ وتی سنگت رکینتگ انت، ءُ وت ءَ دژمن ءِ تیرانی دیم ءَ مِک کتگ، دانکہ دگہ کسے ءِ ھون ریچ مہ بنت۔ آئی ءِ شھادت کمانڈرے ءِ نہ بوتگ، بلکیں برات ءُ استاد ءُ بے تواریں سپاھی ءِ شھادت بوتگ۔ آئی ءِ گڈی جنگ ایوک ءَ گوں دژمن ءَ نہ بوتگ بلکیں گوں وھد ءَ بوتگ، دانکہ دگہ لھتیں ساھت زیرگ بہ بیت کہ آھانی تہ ءَ آئی ءِ درستیں سنگت پہ سلامتی رک ات کن اَنت۔

فدائی کمانڈر جعفر نہ ایوک ءَ دیم ءَ پرکار بوتگ بلکیں گل ءِ ھیلکاری، منسوبہ بندی، ءُ پکری رھشونی ءِ تہ ءَ بنجاھی کرد پیلو کتگ۔ آئی ءِ چیردستی ءَ خاران، دالبندین ءُ نوشکی ءِ ہیڈ کوارٹر ءِ بازیں مشن ءِ منسوبہ بندی ھوار بیتگ انت۔ آئی ءَ فدائین ھیل داتگ۔ ھیلکاری بنجلاں آئی ءَ نہ ایوک ءَ سلاہ ءِ کارمرز کنگ ءِ درس داتگ بلکیں سیاسی سرپدی، راہ ءُ رھبندانی جھد ءِ پدراھی ءِ بابت ءَ ھم گپ ءُ تران کتگ۔ آئی ءِ دھشت یک برابر، پھتو ءُ بے کساسیں آشوبی زانشتے ءِ نمائندگ بیتگ۔

شھید جعفر مینگل ءِ کسہ ایوک ءَ کُربانی ءِ کسہ نہ اِنت بلکیں آ ھما ورنائیں پدریچ ءِ چھرگ اِنت کہ آئی ءَ زانت ءُ سرپدی ءُ ایمان ءِ بُن جشتانی سر ءَ گھگیری جوڑ کُتگ۔ آئی ءِ بے تواری ءِ تہ ءَ کرد ات، آئی ءِ رھشونی ءِ سر ءَ باور ات ءُ آئی ءِ شھادت ءِ تہ ءَ یک نسلے ءِ گواھی ات۔ پہ آئی ءِ وڑیں مردماں راجدپتر ایوک ءَ تاک نبشتہ نہ کنت، وھد گواھی کنت۔