بلوچ اسٹوڈنٹس آرگنائزیشن آزاد ءِ جارکش شولان بلوچ ءَ وتی شنگ کتگین درشان ءَ گوشتگ نمیرانیں سنگت سناء بلوچ آجوئی جھد ءِ ھما آشوبی رھشون اَت کہ دژمن ءِ تیرئِے سینگ ءَ وارت اَنت بلے چہ راجی مکسد ءَ پُشت کِنز نہ بوت۔ راجی جھد ءَ سنگت سنا ءِ پیمیں دلیریں سیاسی جھدکارانی یکشلیں جھد ءُ کُربانیانی برورد اِنت کہ اے آجوئی ءِ سپر نزور نہ تر ایت ءُ ناکہ جھدکار دمانے چہ وتی مکسد ءَ پُشت کِنز بنت۔ آئی ءِ دلیری ءُ پہ بلوچ ڈیھ ءِ دوبر آجوئی ءَ دِستگیں واب مرچی ھمک بلوچ پُسگ ءِ دلاں رُستگ ءُ آئی ءِ ترندیں آشوبی کلوہ ھمک کوچگ ءُ شھراں تالان اِنت۔
آئی ءَ گوشتگ پاکستانی زالمیں اِستان ءَ چوشیں ھزارانی کچ ءَ بلوچ سیاسی جھدکار ءُ رھشون تیر باران کُتگ کہ مروچی بلوچ راجی دپتر ءَ نمیران اَنت۔ اے ھما سر بوتگ اَنت کہ آہاں وتی زِند ءِ ھمک شئے پہ وتی راج ءُ ڈیھ ءِ باندات ءَ ببا داتگ ءُ داں گُڈی ساہ ءَ راجی مکسد ءَ گوں ھمگرنچ بوتگ اَنت۔ اے سرانی روگ پہ راجی جھد ءَ یک مزنیں تاوانے ءَ ابید پہ جھدکاراں یک مھکمیں فلسفہ یے ءِ درس اِنت کہ اے راجی جھد پہ سرانی گُڈگ ءَ نزور نہ بیت بلکیں مروچی بلوچ راج ءَ وتی جھد ءَ گوں پدر کُتگ کہ آ ھونانی شھجواں چہ ساہ زور ایت ءُ دژمن ءَ پہ کھرے جوڑ بیت۔
آئی ءَ گوشتگ سنگت سنا بلوچ آشوب ءِ ھما رُژن اَت کوہ ء سلیمان ءِ مھکمیں کوھاں بہ گِر داں مکُران ءِ مرگاپ ءِ سِکاں تالان اَت۔ آئی ءَ وتی دورچاری ءَ گوں بلوچ سیاسی چاگرد مھکم کنگ ءِ سر ءَ جھد کُت۔ ھما وھد ءَ کہ بلوچ راجی سیاست ءِ تہ ءَ جنگ ءُ کُشگ، ژانگولیں لاشانی چگل دیگ، بلوچ پُسگانی زورانسری گار ءُ بیگواھی ءَ ھوار ھمک ڈولیں اِستانی زوراکی وتی زور ءَ بیت بلے سنگت اے جاوراں چہ تچگ ءِ جاہ ءَ مھکم ءُ دلیری ءَ گوں اوشت ایت ءُ بلوچ ورنایانی سیاسی ھیلکاری ءَ کنگ ءَ بیت ءُ بلوچ سرڈگار ءِ سر ءَ نِشتگیں بلوچ مھلوک ءَ آشوب ءِ رُژن ءَ تالان کنگ ءَ بیت۔
آئی ءَ گوشتگ اے ھما روچ اِنت کہ پاکستانی زالمیں اِستان آئی ءِ تیر سُپتگیں جون ءَ ماں مُرگاپ ءِ سکاں چگل دنت بلے آئی ءِ رِتکگیں ھوناں چہ پُل رُد ایت کہ مرچی مھکمیں جھدکارانی دروشم ءَ بلوچ ڈیھ ءِ دوبر آجوئی ءَ پہ جھد ءَ اَنت۔ بلوچ ءِ ھمک ورنا ءُ جھدکاراں آئی ءِ دلیری وتی تہ ءَ جاہ دیگی اِنت ءُ آئی ءِ دِستگیں واب ءَ بزانت دیگ ءَ بلوچ راجی آجوئی جھد پِگری ءُ جوڈشتی بنیاد ءَ گیش مھکم ءُ منظم کنگی اِنت۔