بلوچستان ءِ جتا جتائیں دمگاں پاکستانی لشکر ءِ آپریشن ءُ بازیں مردمانی زورانسری بیگواھیانی اھوال دیم ءَ اتکگ انت۔
دمگی مردمانی رد ءَ 8 فروری 2026 ءِ شپ ءَ ھب چوکی ءِ دمگ گلشن امیر آباد ءَ بیڑ برگ بیتگ کہ چریشی ءَ بازیں مردم دزگیر کنگ بوتگ اَنت۔
کھول ءِ گشگ انت بیڑ ءِ وھد ءَ عبدالرب ء جمعہ، محمد رحیم ء جمعہ، عبدالرازق ء جمعہ ءُ عبدالمالک ء جمعہ برگ بوتگ انت۔ اھوالانی رد ءَ اے چارین برات اَنت ءُ مشکے نوکجو ءِ جھمنند انت-
کھول ءِ گشگ ءِ رد ءَ عبدالرب ءِ زھگ شاہزیب، محمد رحیم ءِ زھگ ججانگیر، عبدالرازق ءِ زھگ نوروز ءُ شاہ میر ھم دستگیر ءَ گرگ بوتگ اَنت۔ ایشی ءَ ابید فضل کریم ءِ بچ داد شاہ ھم برگ بوتگ۔
کھول ءَ گْوشتگ کہ آپریشن ءِ وھد ءَ جنین ءُ چُک لٹ شاپ کنگ بوتگ انت۔
سانمندیں کھول ءِ رد ءَ فضل کریم آ سرکاری کارمند ءُ پولیس ءِ گوں ھمگرنچ اِنت چہ خضدار ءِ دمگ ءَ آوار جنگ بوتگ۔ آئی ءِ چک نواز ھم سرکاری کارمندے گشگ بیتگ ءُ آ ھم دزگیر کنگ بیتگ۔
ھمے وڑ ءَ فضل کریم ءِ بچ داد شاہ ءِ سر ءَ ھم بھتام جنگ بیتگ کہ آ چہ حب چوکی ءَ آوار جنگ بیتگ۔
دومی نیمگ ءَ نوشکی ءِ دمگ کلی جمالدینی ءِ دمگ ءُ آئی ءِ کش ءُ گوراں پاکستانی لشکر ءِ مزنیں کچے ءَ آپریشن ءِ ھال اِنت۔ دمگی بنشون ءِ رد ءَ دمگ انگیر کنگ بوھگ ءَ اِنت ءُ لوگ پہ لوگ پٹ ءُ پول کنگ بوھگ ءَ اِنت ءُ ھمے وھد ءَ شھر ءِ مردماں جنگ ءُ موبائل فون چیک کنگ ءِ گپ ھم دیم ءَ اتکگ اَنت۔