نوشکی : پاکستانی پوج ءِ نیمگ ءَ چہ لوگانی پروشگ، راجی پارٹیاں زھر ءِ درشان کتگ

بلوچستان ءِ شھر نوشکی ءَ بازیں روچاں چہ کرفیو جتگ، اود ءَ پاکستانی پوج ءِ مزنیں کچے ءَ پیشگامی برجاہ – پوج ءَ شھر ءِ سرجمیں دکانانی بند کنگ ءُ شھریاں لوگاں تاں نندگ پرمان دیگ بیتگ-

ھالانی رِد ءَ بازیں لوگانی پروشگ، وھدے کہ آبادی ءِ تہ ءَ پوج ءِ مزنیں کچے ءَ ساڑی بیگ ءِ سوب ءَ دمگی مردم ترس آماچ اَنت-

بلوچستان نیشنل پارٹی ( بی این پی) ءِ گوستگیں سینیٹر ثناء اللہ بلوچ ءَ گْوشتگ کہ نوشکی ءَ پارٹی ءِ بُنجاھی رھشون ءُ سینٹرل ایگزیکٹو کمیٹی ءِ باسک ھاجی بھادر خان مینگل ءِ مھمان جاہ ءِ پروشگ ءُ ھندو برادری ءِ تُرسینگ ءِ امل ءَ آ تُرندیں لبزاں گوں ایر جنت-

آیاں وتی درشانانی تہ ءَ گْوشتگ کہ پوج ءِ اے وڑیں کاروائی ناں تھنا سیاسی ربیدگ ءِ ھلاپ اِنت بلکیں چاگردی لیکھاں ھم تاوان دنت- آئی ءِ گوشگ اِنت کہ سردار عزیز احمد ءِ کھول ءِ دیمونیاں ءُ راجی ھدمت بیھال کنگ نہ بنت، ءُ آئی ءِ لوگاں مدام ٹکّی کدر ءُ راجی وشھالی جوانیں دود ءُ ربیدگ دیم ءَ برتگ اَنت- ھندو برداری ءِ لوگانی ھلاپ ءَ گامگیج سک بژنیگ ءُ دلپدردی اِنت-

درشان ءِ تہ ءَ گوشتگ کہ یک نیمگے فارم 47 ءِ رِد ءَ برجاہ ھکمران راجی ھدمت نیمگ ءَ سیاسی کارکنانی، ٹکی واجکار ءُ لَس شھریانی گوما بدیں رویشگ ءِ تہ ءَ گیشی بیگ ءَ اِنت- پارٹی ءِ لوٹ اِنت کہ اے وئیلاں زوت گامگیج بزور اِت، سیکیورٹی ءِ نام سر ءَ بیؤکیں زوراکیان بند بہ کن اِت، ءُ اے وڑیں پالیسیاں چہ پھریز اِیت کہ کینگ ءُ بے ستکی ودی کنت-

ھاجی بھارد خان مینگل ءُ آئی ءِ کھول ءِ جمھوری سیاسی جُھد درستانی دیم ءَ اَنت – ھندو برادری ءِ ھلاپ ءَ بدیں رویشگ ءُ گامگیج ءَ زوت ھلاس بہ کن اِت-

اشی ءَ اَبید گوستگیں سینیٹر یوسف بادینی ءَ گوشتگ کہ سردار عزیز احمد مینگل مرھوم بچّاں، گوستگیں دمگی ناظم حاجی میر بھادر خان مینگل ءُ ھستیں دمگی چیئرمین میر محمد علی خان مینگل ءِ مھمان جاہ ءِ پروشگ یک دلپدردیں گامگیجے- آئی ءَ گوشتگ کہ حاجی میر بھادر خان مینگل بلوچستان ءِ واجکار ءُ راجدوستیں سیاستداناں چہ ھوار بیت، کہ آئی ءَ ٹکی جیڑھانی ھلاس کنگ ءَ بلاھیں کردے پیلو کتگ- آئی ءِ بے سبب ءَ دلسیاہ کنگ شریں املے نہ اِنت-

زانگ بہ بیت کہ اشی ءَ ساری پاکستانی پوج ءَ بی ایل اے ءِ سروک بشیر زیب بلوچ ءَ ھوار دگہ مردمانی بُنکی لوگ ھم پروشتگ اَنت-

زانگ بہ بیت کہ 31 جنوری ءَ بلوچ لبریشن آرمی ءَ آپریشن “ھیروپ” دومی بھرگ ءِ رِد ءَ دگہ دمگانی وڑ ءَ نوشکی سر ءَ ھم دستیگ کنگ ءِ ٹاہ داتگ، اود ءَ آ شش روچ ءَ تاں وتی ساڑی بیگ برجاہ دارگ ءَ سوبمند بیتگ اَنت-

بی ایل اے ءَ شش روچ ءَ پد آپریشن ءِ آسری ءِ جار جنان ءَ گوشتگ کہ اے میان ءَ آیاں پاکستانی پوج ءِ بازیں بُنجلے ءُ آئی ایس آئی ءِ ھیڈکوارٹر نشانگ کتگ اَنت، وھدے کہ میڑاں درزنانی کارندھانی کوش ٹاہ ھم داتگ-