گوادر: زورانسری بیگواھی ءَ پد یل بیتگیں ورنا دومی رند ءَ تیرگواری ءَ بیران

بلوچستان ءِ تیابدپی شھر گوادر ءَ ھواریں دمگ جیونی کنٹانی ھور ءَ واتر دیم پہ گوادر ءَ روکیں کیچ دشت شولی ءِ جھمنندیں ورنا کمال ء حاجی داد محمد ناشناسیں گاڑی سواریں مردمانی تیرگواری ءَ بیران –

اھوالانی رد ءَ گوستگیں بیگاہ ءَ کنٹانی ھور ءَ دیم پہ گوادر ءَ روکیں کمال بلوچ ءِ سر ءَ کلر کنٹانی ءَ تیرگواری کتگ ءُ چریشی ءَ چہ آ ھما جاہ ءَ بیران بیتگ-

دمگی مردمانی رد ءَ تیرگواری کنوکانی سیادی پاکستانی پوج ءُ چیریں ادارھانی نیمگ ءَ جوڑ کرتگیں سلاہ بندیں گل کہ آ لس نام ءَ ‘ ڈیتھ اسکواڈ ’ ءِ نام ءَ زانگ بیت انت-

دمگی مردمانی رد ءَ کمال ءِ سر ءَ ھما وھد ءَ تیرگواری بیتگ کہ آ وتی ھمراھانی ھواری ءَ گوادر ءَ روگ ءَ بیتگ کہ راہ ءِ نیم ءَ آیانی دیم ءَ یک کرولا والا گاڑی ءَ جتگ ءُ تچک ءَ پد ءَ تیرگواری کتگ ءُ چریشی ءَ کمال بیران بیتگ-

دمگی مردمانی رد ءَ کمال بلوچ اکتوبر 2024 ءَ پاکستانی پوج ءَ آوار جتگ ءُ بیگواہ کتگ ءُ پد ءَ دو ماہ ءَ پد آ یل بیتگ ءُ پد پیشی ءِ وھد ءَ آئی ءِ سر ءَ گوادر فقیر کالونی ءَ تیرگواری کنگ بیتگ بلے آ وھد ءَ آ ٹپی بیتگ اے دومی رند ءَ آئی ءِ زند اَچ آئی ءَ پُلگ بوتگ-

زانگ بہ بیت بلوچستان ءِ بازیں جاھاں لس مھلوک ھمے داب ءَ تیرگواریانی نشانگ ءُ کشگ بوگ ءَ انت کہ چریشی ءَ بازیں کچے ءَ ورنایانی زند ترس ءُ بیمانی توک ءَ انت-