بیرک گولڈ کمپنی ءِ چیف ایگزیکٹیو ءِ رد ءَ بلوچستان ءَ ھمے زوتاں بوتگیں ارش ءُ پھازگی جاورھالاں پد کمپنی بلوچستان ءِ تہ ءَ برجاھیں سھر ءُ آھن مزنیں شوربندیانی درسیں تکاں چہ بندات ءَ ٹپاسگ ءَ انت ۔
میان استمانی رسانکدر رائٹرز ءِ رپورٹ ءِ رد ءَ بیرک گولڈ کمپنی ءِ سی ای او مارک ہل ءَ وتی مالی رپورٹ ءَ پد بوتگیں کانفرنس کال ءَ گوشتگ کہ بلوچستان ءَ پھازگی ترس ءِ تہ ءَ گیشی ءُ پھازدارانی سرا بوتگیں ارشانی تہ ءَ گیشی آیگ ءَ پد بورڈ ءَ ھمے شئور کتگ کہ ریکوڈک شوربندی ءِ زرکاری ھاتر ءَ مڈی ءُ اے دگہ درسیں بھر دوبر ٹپاسگ بنت ۔
کینڈین کمپنی چیف ایگزیکٹو ءَ دیمتر ءَ گوشتگ کہ ریکوڈک پروجکٹ ءِ پھازگی واکدار ، تعمیراتی ٹائم لائن ، ءُ زرکاری بجٹ ءِ سرجمیں چیزانی ٹپاسگ بوگ ءَ انت اے کارانی کنگ ءَ پد دیمتر ءَ چی کنگ بنت پدا سرپدی دیگ بیت انت ۔
رائٹرز ءِ رپورٹ ءِ رد ءَ سھر ءُ آھن درکنوکیں اے شوربندی مالی ھوالہ 50 درسد بیرک گولڈ ءِ گور ءَ انت ءُ 25 درسد پاکستان ءِ سے وفاقی سرکاری ادارھانی گور ءءَ ءُ 25 درسد بلوچستان سرکار ءِ گور انت ۔
زانگ بہ بیت بیرک گولڈ یک دری کنڈین ملٹی نیشنل کمپنی ءِ کہ پاکستان سعکار ءِ گوم ءَ بوتگیں ڈیلے ءِ رد ءَ بلوچستان ءِ دمگ چاگی ریکوڈک ءَ چہ سھر ءُ آھن در کنت ۔ ۔
بیرک گولڈ ءَ سیندک پروجکٹ ءِ معاہدہ سال 22 ءَ پاکستان سرکار ءِ گوم ءَ کتگ چریشی ءَ پد اے پروجیکٹ ءِ سرا بیرک گولڈ کار کنگ کنگ ءَ انت ۔
اشی ءَ چہ کمپنی ءِ پروجکٹ گروک ءَ پد دمگی مردمانی نیمگ ءَ اے شکایت مدامی اتکگ انت کہ آیانی زمین ءُ ھک لٹ ءُ پل بوگ ءَ انت مالی پائدگ دمگی مرماں رسگ ءَ نہ انت ءُ دری مردم کار ءَ دارگ بوگ ءَ انت ۔
اشی ءَ ابید ھمے ھپتگ ءَ بلوچستان ءِ تہ ءَ بلوچ لبریشن آرمی ءِ چاردہ دمگاں ھوار چاگی ءَ ھم ارش کنگ بوتگ کہ اودا ریکوڈک پروجکٹ ھست انت ۔
اے میان ءَ آئی ءَ وتی درشان ءِ تہ گوشتگ کہ درسیں درملکی ءُ پاکستانی کمپنی مکن کنگ بنت کہ آ بلوچ سرڈگار سرا بلوچ ءِ منشاءَ بگیر کار کت نہ کناں ءُ زوت چداں چہ در بیا انت ۔
ھمے وڈ آپریشن ھیروپ 2 ءِ گڈسر ءَ بی ایل اے ءِ جارکش ءَ وتی درشان ءَ گوشتگ کہ درملکی کمپنی ءُ میان استمانی زردار مکن کنگ بنت کہ آ بلوچستان ءِ مڈیانی لٹ ءُ پل ءَ پاکستان ءِ گوم ءَ بھر مہ زور انت ۔
آئی ءَ گوشتگ کہ یک آجوئیں راجے ءِ بستار ءَ ما وتی سرڈگار سرا پاکستان ءِ اقتدار ءَ نہ من ایں ھر ھما ادارہ گوں پاکستان ءَ ھمکار بنت آ ھما نزر ءَ چارگ بنت ءُ آیانی ساڑی بوگ پوجی مشینری ءَ جتا لیکگ نہ بیت