ھیروپ ءُ ریاستی پروش وارتگیں بیانیہ
نبشتہ کار: سنگران بلوچ
دی بلوچستان پوسٹ
ھیروپ بلوچ جُنز ءِ دپتر ءِ تہ ءَ ھما ترندگامیں گامگیج اِنت کہ بلوچ وتواجھی جنز ءَ را نوکیں رنگے بکشاتگ، ھیروپ ءَ وت ءَ را چو سیاہ گوات ءِ پیم ءَ ھموک ھند ءُ دمگاں سر کُتگ ءُ بلوچ لَس مھلوک ءَ را ھمے باور کنائینتگ کہ بلوچ راجی لشکر اے بودناکی دار ایت کہ یک وت واجھیں زمینے ءِ پاسبانی ءَ کُت بہ کنت۔ ھیروپی لشکر ءَ ھموک بلوچ پیر ءُ ورنا زھگ ءُ زالبول، پوریارگر، شپانک، وانندگ ءُ بہ واننداگاں اے سِتک داتگ کہ بلوچ اِچ رنگیں دری راج ءِ ایردستی ءَ اوپار نہ کنت ءُ آئی ءِ دیم ءَ مدامی اشتوک بیت ءُ بلوچ راج ءَ مدامی ھمے باور ءِ سر ءَ بیسہ داشتگ ءُ بلوچ راجی جُنز ءُ بلوچ راجی لشکر ءِ گون ءَ ھمکپوگی کُتگ۔ ات تھنا یک بیانیہ ءِ جوڑ نہ بوتگ کہ ایوک ءَ لبزان گوں بندوک بوتگ یاکہ تھنا ترانی تھ ءَ اِش کنگ بوتگ بلکیں اے یک راستی ءِ جوڑ بوتگ کہ بلوچ اُلس ءَ را گوں وتی راجی لشکر ءُ جُنز ءَ گوں چینکدر مھر اِنت۔
ھَر دیں کہ شال ءِ دلبند ءَ راجی لشکر ءِ پُسگ گوں دلیری ءَ سنگران ساڑی بنت گُڑا لس مردُمانی پہ مھر امباز کنگ یاکہ کُنگرانی پیشانیانی بوسگ دئیگ وت اے گپ ءِ درائی ءَ دنت کہ بلوچ مھلوک ءَ وتی راجی لشکر ءَ گوں چونیں مھر ھست۔ تھنا شال ناں بلکیں ھر ھما جاہ ءَ کہ راجی لشکر ءِ پُسگ وتی پاداں ایر کناں اود ءَ بلوچ اُلس ساڑی بیت ءُ وتی گوں جنز ءَ یکمشتی ءِ نشان ءَ پہ مھر ایر کنت۔
دومی نیمگ ءَ ریاستی مشنیری اِنت کہ Social media دنیا ءِ تھ ءَ پہ وت ءَ یک narrative ءِ جوڑ کنگ ءَ ھزاراں پندل سازگ ءَ اِنت ءُ لکانی کساس ءَ زر ءُ مال ھرچ کنگ ءَ اِنت، جاھے دورگیں بیان، جاھے وتسریں کِسھے ، جاھے Deepak ویڈیوئِے ءِ وسیلگ ءَ مدامی ھمے کوشست ءِ تھ ءَ اِنت کہ بلوچ جنز یاکہ ھستیں بلوچ تھریک ءِ بیانیہ ءِ ایر بہ جناں۔ تھنا سوشل میڈیا نہ بلکیں ریاستی سافٹ پالیسی مدام جنز ءِ نوک جتگیں گاماں گوں مٹ بنت، انچوشکہ زوت ءَ شِنگ بوتگیں ھزارنی کچ ءَ نوکری ءِ جار، China Gwadar Technical Institute ءِ انگوریشن، ھزارانی کچ ءَ Internship ھوار اَنت، ایشی ءَ ابید ریاست وتی بیانیہ ءِ اسر اندانز کنگ ءِ واستا یکشل ءَ ھمے باور کنائینگ ءِ جھد اِنت کہ “ ھم تھرکی کہ راہ پر روان دوان “، اے تھنا آپریشن ھیروپ ءَ پد ءَ جار اِنت کہ صوبائی حکومت ءِ نیمگ ءَ تالان کنگ بوتگ، ایشی پیسر سدانی کچ ءَ ھمے رنگیں پروگرام جنزگ ءَ بوتگ اَنت۔
چونھا پاکستان ءِ پروش آئی ءِ وتی بیانیہ سازی ءَ پیش داشتگ کہ آئی ءَ اے آپریشن ءِ تہ ءَ چینکدر پروش وارتگ، پرچا کہ بیانیہ ھما وھد ءَ سانمند کُت کنت لس مھلوک چہ زمینی راستی سرجم ءَ آژناگ مہ بیت یا کہ سرپر مہ بیت، ءُ بلوچ مھلوک ءِ سرجم ءَ گوں زمین ءَ بندوک اِنت ءُ سرجمیں راستی ءَ پھمت کنت گُڑا اُلس ءِ تھ ءَ ریاستی وتگڑیں بیانیہ جاہ زُرت نہ کنت بلکیں ھما مردم اے بیانیہ ءَ چہ سانمند بوت کناں کہ بلوچ سرزمین ءِ زند ءَ گوازینگ ءَ نہ اَنت، اے بیانیہ بلکیں پنچاب ءُ اسلام آباد ءِ نشتگیں جاھمنند ءِ اسر انداز کُت کنت بلے بلوچ مھلوک ءِ تھ ءَ اچ بر سوبمند بوت نہ کنت۔ ریاستی بیانیہ ءِ وت ءَ را بلوچ مھلوک ءِ تھ ءَ پدر کُتگ کہ راست چی اِنت ءُ دورگ کجام انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-