بی ایل اے ءِ جارکش جیئند بلوچ ءَ وتی شنگ کرتگیں نوکتریں درشان ءِ تہ ءَ گوشتگ کہ بلوچ لبریشن آرمی یکشل ءَ برجاھیں آپریشن ھیروپ ، زمینی راستی ، ءُ دژمن پوج ءِ دروگیں درشانانی پژدر ءَ یکرندے پدا تچک ءَ اے جار جنت کہ آپریشن ھیروپ 2 ءَ مروچی شش روچ سرجم بوتگ کہ گوں جزم ، یکشل ءُ پوجی سوبمندیاں گوں برجاہ انت ۔ تاں ھما وھد ءَ بی ایل اے وت ھلاسی ءِ جار مہ جنت زورگیریں ریاست ءِ بٹاک ءُ آئی ایس پی آر ءِ ٹاہ بس پروپیگنڈھانی تہ ءَ ھوار کنگ بنت کہ آیاں ناں زمینی راستی ءِ پشتپناھی ھست ءُ ناکہ بلوچ چاگرد آیانی سرا اوست دار ایت ۔
آئی ایس پی آر ءِ نوکتریں درشان ھما دروگانی درچ انت کہ آپریشن ھیروپ اولی روچ ءَ بندات بوتگ ات ۔ ریاست ءَ اءُلی روچ ءَ اے دروگیں ٹاہ داتگ ات کہ آیاں آپریشن سرجم کتگ ءُ درسیں ارشکار جتگ انت ءُ گوستگیں شش روچیں یکشل ءَ ھمے گپ ءَ جنگ ءَ انت ۔ آئی ءِ ھر نوکتریں درشان گوستگیں بٹاکانی ڈامیچ (تردید)ءَ کنت ءُ ھر یک وتگڑیں سوبمندی“ راستی ءَ پروش ورگ ءِ منگ انت ۔ ھر وڈیں باسمائیں اھوالکار یا آجو مجگ ءِ ھاتر ءَ اشی ءِ پھمگ گران نہ انت کہ زورگریں پاکستانی پوج ایوک ءَ جنگ ءِ پڑ پدکنز نہ بوتگ بلکنہ درشانی تکاں ھم سرجمی ءَ بے سوب ایں ۔
آئی ءَ گوشتگ کہ بلوچ لبریشن آرمی ءِ سرمچار ءُ جندندر کپن ءَ سر ءَ بند انت ءُ بھر زور انت ۔ پہ مئے ھاتر ءَ ھر یک سرمچاری ءِ نمیرانی پھریگ ، گھگیری ءِ جزم ، پہ پدریچ ءَ رژن ءِ چیدگ بنت ۔ بی ایل اے وتی نمیرانیں سرانی نام ، اکس ، کچ ءُ نمیرانی ءِ ساھت ءَ پہ پھر شنگ کنت ءُ آیانی لیکہ زرمبشت ءِ بنجاہ ءَ پھریزگ بنت ۔ بلے پاکستانی پوج وتی زرزیریں سپاھیانی جون ءُ پجار ءَ چیر دنت ءُ آیانی تابوت ءَ ڈب ایت پرچاکہ آ زانت اے مردم ھنچیں زالمیں جنگے ءِ تیل بوتگ انت کہ آئی ءِ ناکہ اکلاکی بنھشت ءِ ھستطناکہ سیاسی جواز ءُ مھلوک ءِ پلامرزی ئے ۔
جارکش ءَ گوشتگ کہ آئی ایس پی آر ءِ نیمگ ءَ ھمک روچ بازیں سرمچارانی نمیران کنگ ءِ ٹاہ ءِ دو مزنیں مولانی رد ءَ کنگ بیت ۔ اولی ایش کہ ھاسکر پنجاپ ءِ مھلوک ءِ دیم ءَ ریاستی ادارھانی یکشلیں پوجی بے سوبی ، پھازگی بجٹاں چیردیگ بنت تاکہ چہ آیاں اے جست کنگ مہ بیت کہ جھان ءِ ھپتمی مزنیں بجٹ ءُ نوکتریں ٹیکنالوجی ءَ سر ریچیں پوج ءِ بوگ ءَ ابید بلوچ سرڈگار ءِ سرا پرچا زورگیری بوگ ءَ نہ انت ۔ دومی ھمیش کہ وتی دروگیں درشاناں راست کنگ ءِ ھاتر ءَ زورانسری آوار جنگ بوتگیں مردماں درکانودی کشگ ءُ آیاں سرمچار زاھر کنگ تاکہ ریاست ءِ ازیت جاھ ءُ زورانسری آوار جنی کتکاری چیر دیگ بہ بیت ۔
جارکش ءَ گوشتگ کہ آپریشن ھیروپ ءِ میان ءَ بلوچ راج ءِ کمک ، انٹلی جنسی کمک ، پلامرزی گون بوتگ اےپہ زورگیریں ریاست ءَ نہ سگوکے ۔ ریاستی ادارہ کہ پہ توپک ءِ زور ءَ زمین ءِ سرا کبزہ کنگ ءِ ناکامیں جھدے کنگ ءَ انت ءُ وتی درشانی مشینری ءَ چہ وت مزلوم زاھر کنگ ءِ جھد ءَ دلگوش انت بلے اشی ءِ پژدر ءَ بی ایل اے وتی رھبندی گھگیری ، زمین ءَ گوں بندوکی ، ءُ یکشلیں دیمھونیانی برورد ءَ یک نپرشوکیں تاکت ءِ تہ ءَ مٹ بوتگ ۔
جارکش جیئند بلوچ ءَ گوشتگ کہ ما یکرندے پدا اے گپ ءَ تچکی ءَ گوش ایں کہ آپریشن ھیروپ ءِ ھلاسی ءُ سوبمندی ءِ جار ءَ ایوک ءَ بلوچ لبریشن آرمی جنت ناکہ زورگیریں تاکت کہ ھمک روچ وتی دروگاں گوں وتی پروش ءَ چیر دیگ ءِ ناکامیں جھد ءَ کنگ ءَ انت ۔ ءُ وھدیکہ بی ایل اے اے آپریشن ءِ ھلاسی ءِ جار ءَ جنت آ جار ایوک ءَ زمینی کنٹرول ، انٹلی جنس سوبمندی دژمن ءِ پد ماں پد پدکنزی ءِ نہ بیت بلکنہ ھما وڈ بیت کہ گوستگیں شش روچاں بوان انت کہ بی ایل اے ءَ دژمن ءَ چہ گپتگیں دمگ ، تباہ کتگیں بنجل ءُ دستیگ گتگیں پوجی مڈیانی اکس ءُ تامر وتی میڈیا چینل ءَ شنگ کتگ انت ۔