31 جنوری ءَ بلوچستان ءِ تیاب دپی شھراں شال، گوادر، پسنی، دالبندین، ھاران ءُ نوشکی ءَ ھوار بلوچستان ءِ دوازدہ جتاجتائیں شھراں یکیں وھد ءَ ھکومتی ءُ پوجی شوربندی نشانگ کنان ءَ اُرش بندات کتگ اَنت- بلوچ لبریشن آرمی ( بی ایل اے) ءَ اے سرجمیں اُرشانی زمہ واری منّ اِتگ آ آپریشن ھیروپ ءِ دومی بھرگ گوشتگ-
اُرشانی میان ءَ نشانگ بیتگیں دمگی مردمانی رِد ءَ تُرندیں تراک ءُ تیرگواری ءِ سوب ءَ مردم تُرس ءِ آماچ بیتگ اَنت، بلے اشی ءَ پد اے سرپدی بیتگ کہ دمگ ءَ بی ایل اے جنگول پُترتگ اَنت گُڑا دمگی مردم چو مدام ھساب ءَ لوگ ءَ درتکگ اَنت- شال ءُ نوشکی ءَ ھوار باز شھراں زالبول، چُک ءُ ورنایاں جنگول آپ ءُ ورگ داتگ اَنت- سوشل میڈیا ءَ شنگ بیتگیں تامُراں گندگ کئیت کہ مزنیں کچے ءَ مردم سلاہ بندیں مردمانی کش ءُ گوراں مُچ بیتگ ءُ اکس ءُ تامُر جوڑ کنگ ءَ اَنت-
شال ءِ یک جھمنندے ءَ دی بلوچستان پوسٹ ءَ گوشتگ کہ لَس روچاں لوگ ءِ دراھگ ءِ وھد ءَ درستاں چہ پیش پجّار کارڈ ءِ پکر بیتگ کہ کجام دمک ءَ میتگ یا چیک پوسٹ سر ءَ سکیورٹی فورسز پجّار نام ءَ مہ دار اِیت یا کہ شک ءِ بُنیاد ءَ بیگواہ مکنت، بلے اے روچ ءَ دمک ءُ میتگاں پوج ءِ جاہ دمگی ءُ آشنائیں دیم تر ءُ ترد کنگ ءَ اَنت،چریشی ءِ سوب ءَ اولی رند ءَ لوگ ءَ چہ دراھگ ءَ تُرس نہ بیتگ-
دمگی مردمانی گوشگ اِنت کہ بی ایل اے ءِ جنگولانی رویشگ لَس شھریانی گوم ءَ اھترامی بیتگ ھچ بے میاریں مردم نشانگ نہ کتگ اَنت-
بی ایل اے ءِ آفیشل میڈیا چینل ھکل ءَ جنگ ءِ میان ءَ چہ گوادر ءَ زالبولیں جنگول ءِ کمان ءِ درگت ءَ یک توار بندیں کلوھے ھم شنگ کتگ، کہ آ گوشگ اِنت شھریاں مُھر کنگ ءِ ھاتر ءَ مردم چہ لوگاں در کتگ اَنت، بلے اے میان ءَ پاکستانی پوج ءِ نیمگ ءَ چہ راکٹ آس دیگ بیتگ- دمگی مردمانی رِد ءَ اے اُرشاں دوازدہ مزدور ءُ زالبول بیران بیتگ اَنت-
اے میان ءَ بی ایل اے ءِ نیمگ ءَ چہ جنگی جاورھالانی وھد وھد سر ءَ سرپدی وتی آفیشل چینل ءَ چہ شنگ کتگ اَنت، وھدے کہ پوجی ءُ سرکاری واکدار نیمگ ءَ چہ داں دیراں ھچ وڑیں درشان دیم ءَ نیتکگ-
مروچی پنچمی روچ ھم اے دمگاں جاورھال ناگیگ اَنت- سرجمیں بلوچستان ءَ انٹرنیٹ ءُ دگہ ھال اھوالی نزام بند اِنت، وھدے کہ نوشکی تنی وھدے بازار پچ نہ بیتگ-
دومی نیمگ ءَ پاکستان پوج ءِ جارکش ادارہ آئی ایس پی آر ءَ بلوچستان ءِ اے وھد ءِ آپریشن ءِ میان ءَ 216 سلاہ بندانی جنگ ٹاہ داتگ- آئی ایس پی آر ءِ رِد ءَ 29 جنوری 2026 ءَ پنجگور ءُ ھرنائی ءِ دمگاں کاروائی ھمے وھد ءَ بندات کتگ وھدے سلاہ بندیں مردم دمگی آبادی ءِ واستا ھترہ جوڑ بیتگ اَنت- اے کاروائیانی میان ءَ 41 مردم جنگ بیتگ، وھدے اشی ءَ پد جتاجتائیں دمگاں انٹیلیجنس بیسڈ آپریشنز ءَ یکجاھی ھساب ءَ 216 سلاہ بند جتگ-
آئی ایس پی آر ءِ رِد ءَ اے کاروائیاں 36 لَس شھری، کہ آیانی تہ ءَ زالبول چُک ھوار اَنت، وھدے کہ 22 سکیورٹی کارندہ ھم کُشگ بیتگ اَنت-
ھم وڑ بی ایل اے ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ آپریشن ھیروپ دومی بھرگ ششمی روچ ءَ ھم سرمچارانی گوں مھمکیں سنگران اَنت ءُ دستیگ برجاہ ءَ اِنت-
بی ایل اے ءَ ٹاہ داتگ کہ بنداتی ءُ اندازو ءِ رِد ءَ تنی وھدے پاکستانی، پوج، ایف سی، پولیس، سی ٹی ڈی ءُ پوج ءِ چیردستی ءَ کارکنوکیں ڈیتھ اسکواڈ ءِ کم چہ کم 310 کارندہ مرتگ اَنت، وھدے کہ زمینی جاورھالاں چہ اے تاوانانی گیش بیگ گمان اِنت-
گل ءَ گوشتگ کہ اگاں آزاتیں میڈیا ٹاھانی راستی ءُ زمینی راستی ءَ چارگ بہ لوٹ اَنت گُڑا نوشکی، دالبندین، شال، ھاران، مستونگ، گوادر، پسنی، تمپ ءُ تربت ءَ ھوار پوج ءِ بُنجل ءَ چار اِت کن اَنت-
بی ایل اے ءِ رِد ءَ آپریشن ءِ میان ءَ تنی وھدے گل ءِ 46 جنگلو جنگ بیتگ اَنت، آیانی تہ ءَ 29 مجید بریگیڈ ءِ فدائین، 10 فتح اسکواڈ ءُ 7 ایس ٹی ایس او یونٹ ءِ باسک ھوار اَنت-
شال ءِ یک جھمنندے ءَ گوشتگ کہ پنچمی روچ ءَ ھم ریڈ زون ءِ دمگ بند اِنت ءُ اُرشاں پد تباہ بیتگیں ماڑیانی ٹُکر تنی وھدے دگانی سر ءَ کپتگ اَنت- دمگی اِھوالکاراں ھم شکایت کتگ کہ آیاں ھمے وھد ءِ سر ءَ رپورٹنگ ءَ چہ دارگ بیتگ اَنت-
شال ءَ گوستگیں روچ برجم بیتگیں آل پارٹیز کانفرنس ءَ ھکومت ءِ سر ءَ تُرندی ءَ ایر جتگ، اود ءَ ترانکاراں گوشتگ کہ یک نیمگے جاور ءِ پُرایمنی ءِ ٹاہ دیگ بیگ ءَ اِنت دومی نیمگ ءَ ٹاہ دیگ بیگ ءَ اِنت کہ مزنیں کچے ءَ سلاہ بندیں مردم جنگ بیتگ، ھالانکہ اُرشکار وت ریاستی بُنجاھاں سر بیتگ اَنت-
ھکومتی ءُ پوجی ٹاھاں چہ ششمی روچ ءَ ھم بلوچستان ءَ جاور ناگیگ اَنت، وھدے کہ انٹرنیٹ ءُ دگہ ھال اھوالی نزام بندی ءَ راج دلسیاھی ءِ دیمپانی ءَ گیشی اتکگ-