بلوچستان ءِ بنجاھی شھر شال ءَ یک مردمے پاکستانی لشکر ءَ آوار جتھ ءُ ناشناسیں جاھے ءَ برتگ۔ آئی ءِ کھول ءِ گْوشگ اِنت کہ دزگیر کنگ ءَ پد آئی ءِ ھِچ ھال ءُ اھوال نیست انت-
بیگواھیں مردم ءِ پجار بلوچستان یونیورسٹی ءِ بی ایس ءِ 25 سالی ئیں نودربر اسداللہ ء ظفر اللہ ءِ نام ءَ بوتگ۔ کھول ءِ رد ءَ اسد اللہ چار شمبے ءُ پنچ شمبے ءِ نیامی شپ ءَ شال ءِ باروری روڈ ءِ دمگ ءَ چہ دزگیر کنگ بوتگ۔
کھول ءِ گشگ ءِ رد ءَ سادہ پوشاکیں مردم کہ سی ٹی ڈی (انسداد ناشرکاری ءِ محکمہ) ءِ کارندہ زانگ بوتگ اَنت شپ ءَ دیر ءَ آھانی لوگ ءَ سر بوتگ اَنت ءُ اسد اللہ ءَ گوں وت برتگ ئے۔ کھول ءِ گشگ اِنت کہ چہ آئی ءِ دزگیر کنگ ءَ پد چہ ھچ پولیس اسٹیشن یا ھمگرنچیں ادارہ ءَ ھچ وڑیں ھال ءُ اھوال دیگ ءَ نہ انت ءُ نہ کہ اسد اللہ ءِ انوگیں جاہ ءُ نشان ءِ بابت ءَ ھچ وڑیں ھال ءُ اھوال دیگ بوھگ ءَ اِنت۔
بلوچستان ءَ گوستگیں بازیں وھداں بیگواھیانی بازیں کیس دیم ءَ اتکگ کہ ایشاں انسانی ھکانی گل پدردی درشان کنگ ءَ انت۔ بیگواھیں مردمانی کھولاں بازیں براں بندیگیں مردمانی درکانودی دزگیری ءُ کوش ءِ بھتام ھم سرکار ءِ سر ءَ جنگ بوگ ءَ انت-