دُژمن تاچینگی انت
جورین بلوچ
دی بلوچستان پوسٹ
نوں پیسلہ بوتگ ات
کہ وتی گلزمین ءِ سر ءَ
دُژمن تاچینگی انت
آئی ءِ یک پدے ھم
مئے پاکیں زمین ءِ سر ءَ مہ گواھیت
زمین کربانی لوٹگ ءَ ات
وتی بچ،
پیر،
کماش،
زھگ
ءُ زالبولاں توار کنگ ءَ ات
بلے اے رندی کربانی ءِ لوٹ مٹ بوتگ ات
نوں زمین پہ لس کربانی ءَ ایمن بوگی نہ ات
زمین گْوانک جَنگ ءَ ات
پیسلہ سازیں وھد اتکگ
پیسلہ سازیں جنگ لوٹیت
گڑا پیسلہ سازیں کربانی پکار انت
دروشم بچکندان ات
وتی زند ءَ زمین ءِ باھوٹ کنگ ءَ اتکگ ات
زمین ءَ گشت نوں کربانی تہنا زندگی ءِ بس نہ انت
دروشم ءَ بچکندیت ءُ گشت
منی بچکنداں ھم بُزور گوں
یاسمہ ءُ وسیم اتک انت
مئے مہر،
مئے عشق،
مئے زھگ،
مئے زند،
مئے وشی
زمین تئی باھوٹ انت
ھتم ناز اتک
وتی زند ئِے زمین ءِ باھوٹ کت
پدا ناکو فضل اتک
زمین لرزگی ءَ گپتگ ات
وتی وارسانی سر ءَ پہر کنگ ءَ ات
اے درستیں کربانی ئِے جنگی کماندار ءِ باھوٹ کت انت
جنگی کماندار مُشکول ات
کربانی ءَ جنگی شوربندیانی تہ ءَ مٹ کناں ات
داں ھما روچ اتک
وھدے کربانی
راجی مارشت
مہکمتریں جنگی شوربندی ءِ تہ ءَ مٹ بوت انت
گڑا ھیروپ ات
ھیروپ ءِ دومی مرحلہ ات
جنگ ءِ دروشم مٹ ات انت
دُژمن گریوگ ءَ ات
زمین پہ ناز ات
کربانی چہ امر
سیادی
پیری
کسانی
ءَ سر گوستگ ات