پنجگور پاکستانی پوج ءِ پلامرزی ڈیتھ اسکواڈ ءِ دست ءَ جاسم درکانودی کشتگ- بی وائی سی

بلوچ یکجھتی کمیٹی ءَ شنگ کتگیں درشان ءِ تہ ءَ گْوشتگ کہ جاسم ء محمد آدم یک مزدورے بیتگ کہ پنجگور ءِ جھمنند بیتگ کہ آ یکبرے آوار جتگ ءُ بیگواہ کتگ ءُ پد آ درکانودی کشتگ- آئی ءِ لاش پنجگور ءِ دمگ وشبود ءَ دزکپتگ-

آئی ءَ گوشتگ کہ زورانسری آوار جنی ءَ پد جاسم ءِ درگت ءَ ھچ وڑیں ھال سر نہ بیتگ، چریشی ءِ سوب ءَ آئی ءِ کھول سک سسّائی ازیت ءُ گم ءِ تہ ءَ اَنت- پد ءَ اشی ءِ تیرسُپتگیں لاش چہ وشبود ءَ دزکپتگ، کہ اے راست بیتگ کہ آ بندیگی وھد ءَ کُشتگ-

آئی ءَ گوشتگ کہ اے کوش تچکی ءَ پاکستانی پوج ءِ پلامرزی ڈیتھ اسکواڈ ءِ نشانی ءَ کنت، سرجمیں بلوچستان ءَ پُرکار اَنت-

آئی ءَ گوشتگ کہ جاسم ءِ سیادی یک مھنت کنوکیں کھول ءَ چہ بیتگ آئی ءَ مزدوری کتگ وتی کھول ءِ لاپ والینتگ- آئی ءِ کوش زورانسری آوار جنی ءَ پد درکانودی کوش ءِ گیشی ءَ پدر کنت، اود ءَ ھاسکار بلوچ شھریاں نشانگ کنگ ءَ اِنت کہ آیانی تہ ءَ مزدور، نودربر، استاد ءُ دگہ پڑ مردم ھوار اَنت-

آئی ءَ دیمتر ءَ گوشتگ اے کوش ءَ بلوچ راج ءِ تہ ءَ تُرس، بے پھازی ءُ مچی گم گیش کتگ- ریاستی پلامرزی زوراکی ءِ برجاھیں چاگرد ءَ بے دلجمی دیمپانی کنگ ءَ اِنت ءُ بلوچستان ءَ ریاستی پوج ءِ رِد ءُ بنداتگیں بے سزای ءِ دود ءَ پاشک کنت-