سرجمیں بلوچستان ءَ بلوچ لبریشن آرمی ھمگرنچیں اُرشاں سکا ناگیگی ودی کتگ بازیں کچے ءَ بیرانیانی اھوال
میان استمانی ھال رسانکی ادارگ رائٹرز ءِ رد ءَ پاکستانی لشکر ءَ چہ بازیں روچاں ترندیں جنگ ءَ پد نوشکی ءِ تھسیل ءِ سر ءَ پد ءَ دوبر دستیگ کنگ ءِ ٹاہ داتگ کہ اود ءَ بلوچ لبریشن آرمی ءِ سلاہ بندیں مردماں پولیس اسٹیشن ءُ بازیں سیکورٹی جاھاں دستیگ کتگ انت-
رائٹرز ءِ رد ءَ پاکستانی لشکر ءَ اے گپ ءِ پدرائی کتگ کہ آپریشن ءِ وھد ءَ ھیلی کاپٹر ءُ ڈرون کارمرد کنگ بوتگ وھدے کہ شمبے ءِ روچ ءَ بندات بوتگیں جنگ ءَ بیران بوتگیں مردمانی کلیں کساس 58 ءَ سر بوتگ انت۔
شمبے ءِ سھب ءَ بی ایل اے ءِ نیمگ ءَ ھترناکیں مھکم ءُ اُرشاں سرجمیں بلوچستان ءَ سانمند کتگ کہ اود ءَ جتا جتائیں جاھاں لشکر ءُ سلاہ بندانی میان ءَ بازیں روچاں جنگ ءُ چوپ برجاہ انت-
پاکستانی لشکر ءِ کارندھاں رسانکدر ءَ ٹاہ داتگ کہ آھانی 22 کارندہ، 36 لس مردم ءُ 100 ءَ چہ گیش اُرش کنوک بیران بوتگ اَنت۔
رد ءَ روئٹرز ءِ رد ءَ بلوچ لبریشن آرمی ءِ اُرشانی نشانگ بیوکیں شال ءِ نندوکیں روبینہ علی ءَ آئی ءِ نمائندگ ءَ گپ کنان ءَ گوشتگ شھر ءَ بیوکیں اُرش ءُ بمب تراک ءَ لگ اتگ کہ منی لوگ ءِ چھت ءُ دیوال چِست بوگ ءَ انت-
رائٹرز ءِ رپورٹ ءِ رد ءَ بی ایل اے ءِ سلاہ بندیں مردماں نوشکی ءِ تھانہ ءُ بازیں سرکاری ماڑیانی سر ءَ دستیگی کتھ ءُ سئے روچ ءَ گیش دستیگ کتگ۔
نوشکی پولیس ءِ کارندھاں میان استمانی رسانکدر ءَ گوں تران کنان ءَ گْوشتگ کہ اے درگیجگ ءَ 7 کارندہ بیران بوتگ اَنت ءُ دو شمبے ءِ شپ ءَ پاکستانی لشکر ءَ ٹاہ کتگ کہ آیاں دمگ ءِ سر ءَ پد ءَ وتی دست گپتگ۔ پورس ءِ واکدار ءِ رد ءَ نوشکی ءَ گیش لشکر دیم دیگ بوتگ ءُ اُرش کنوکانی ھلاپ ءَ ڈرون ءُ ھیلی کاپٹر کارمرد کنگ بیگ ءَ انت ۔
رائٹرز ءِ رپورٹ ءِ رد ءَ بی ایل اے ءَ سئے شمبے ءِ روچ ءَ جار جتگ کہ آئی ءَ وتی آپریشن ھیروف ءِ وھد ءَ 280 پاکستانی کارندہ کُشتگ اَنت ءُ ھمے وھد ءَ وتی 30 ءِ کساس ءَ سنگتانی نمیرانی ھم پدرائی کتگ۔
لشکری کارندھاں رائٹرز ءَ گوں تران کنان ءَ گْوشتگ کہ بلوچستان ءَ اُرش شمبے ءِ روچ ءَ سھب ءِ چار بج ءَ نوشکی ءُ پسنی ءَ وت کُش اُرش ءَ چہ بندات بوتگ اَنت ایشی ءَ پد بلوچستان ءَ 11 ءَ چہ گیش جاھانی سر ءَ مھکمیں اُرش کنگ بوتگ انت۔
میان استمانی ھال رسانکدر ءِ رد ءَ سلاہ بندیں مردماں انگیر ءِ وھد ءَ کم چہ کم شش دمگی کارگس دستیگی کتگ ءُ یک جاھے ءَ آ چہ سر وزیر ءِ گس ءَ بس یک کلومیٹر ءِ دوری ءَ سر بوتگ اَنت۔
پاکستانی واکداراں ٹاہ کتگ کہ بھارت اے اُرشانی ھمایت ءَ کنگ ءَ اِنت بلے ھچ وڑیں سبوت پیش کنگ نہ بوتگ۔ ھندوستان ءِ درئی کارانی وزارت ءَ اے گپ رد کتگ ءُ گشتگ کہ اسلام آباد ءَ بلوچ راج ءِ دیریں لوٹانی نیمگ ءَ دلگوش دیگی اِنت۔
رائٹرز ءَ گوں تران کنان ءَ پیسریگیں لیفٹیننٹ جنرل امیر ریاض ءَ کہ 2015 ءَ بگر داں 2017 ءَ بلوچستان ءَ آرمی چیف بوتگ آئی ءَ گشتگ کہ گوستگیں دہ سال ءِ تہ ءَ بی ایل اے ءِ جنگ گیشتر ھمگام ءُُ سانمند بوتگ۔
آئی ءَ گوشت کہ اے گل ءَ اوگانستان ءَ را اُرشانی واستا جاگہ ءِ رنگ ءَ کارمرد کتگ، اے ٹاہ پاکستان ءِ انوگیں فوجی ءُ سرکاری سروکی ءَ ھم کتگ، اگاں چہ اوگانستان ءِ طالبان سرکار اے گپ ءَ رد کنت۔
ریاض ءِ رد ءَ اے جیڑہ دیم ءَ گیش ءُ گیوار ءُ جمود ءِ دوراں چہ گوزگ ءَ اِنت۔ جاور ھال ھراب بوتگ اَنت ءُ نوں پسو پسلہ کنوک بیت کہ ایشی ءِ آسر ءَ بی ایل اے ءِ توانائیانی سر ءَ سکیں ٹپّے کپ اِیت۔
آئی ءَ اے گپ ءِ باوجود گوشت کہ گڈسرا جیڑہ ءِ گیواری ایوک ءَ سیاسی امل ءُ جوانیں ھکومت داری ءِ وسیلگ ءَ چہ دست کپ ایت۔