آپریشن ھیروپ2.0
ٹی بی پی شونگال
31 جنوری ءِ سھب ءَ بندات ءَ بلوچستان ءِ جتا جتائیں شھراں پاکستانی پوج ءِ گچینی جاھانی سر ءَ پدائی اُرش ءُ پوج ءُ سی ٹی ڈی ءِ بلوچ جنگولانی ترندیں جنگ ءُ چوپ بیتگ انت- بلوچستان ءِ بنجاھی شھر شال، مستونگ، دالبندین، کلات، گوادر، پسنی، تمپ ءُ نوشکی ءَ ھوار پشت ماں پشت ءَ جنگولاں کنٹرول وتی دست ءَ کتگ انت ءُ پاکستانی پوج ءِ گون ءَ دیم پہ دیمی جنگ بندات کتگ- آیانی ھترناکیں ءُ پدائی اُرشانی پھنات بلوچستان ءِ کنڈ کنڈ ءُ گچینی جاھاں شنگ ءُ تالان بیتگ – بلوچ لبریشن آرمی ءَ اے اُرشانی زمہ واری من اتگ ءُ ایشی ءَ را آپریشن ھیروپ ءِ دومی بھر ءِ نام داتگ-
آپریشن ھیروپ دومی بھر بلوچ آجوئی جنگ ءِ سلاہ بندیں گوستانک ءِ مسترین ءُ ھترناکین جنگ انت، چریشی ءَ بلوچ لبریشن آرمی ءِ پدائی یونٹ مجید بریگیڈ، ایس ٹی او ایس ءُ انٹیلی جنس وبت زراب ءِ جنگول ھوار انت- اے ھترناکیں اُرشاں بی ایل اے ءِ جنگولاں بلوچستان ءِ بنجاھی شھر شال ءَ ھوار دوازدہ جاھاں کنٹرول وتی دست ءَ کتگ ءُ پوجی بنجلانی سر ءَ ھونریچیں اُرش کتگ ءُ کوسٹل ھائی وے ءُ کراچی — شال ءِ شھدگ ءِ سر ءَ جتا جتائیں جاھاں کنٹرول وتی دست ءَ ریاستی امل داری ھلاس کتگٹ
سرجمیں بلوچستان ءَ اے وڑیں اولی اُرش انت کہ چریشی ءَ ھزارانی جنگولاں پشت ماں پشت ءَ سی ٹی ڈی، پوج ءُ پاکستانی انٹیلی جنس ادارہ نشانگ کتگ انت- تھانہ سوچگ بیتگ انت، پوج ءُ پولیس ءِ آفیسر دزگیر کتگ انت ءُ پولیس بنجل ءُ پوجی بنجلاں سلاہ برتگ انت- مجید بریگیڈ ءِ پدائیناں بلوچستان ءِ بنجاھی شھر شال ریڈ زون، نوشکی ءَ پوج ءِ بنجاھی بنجل، گوادر ءَ کوسٹ گارڈ بنجل، پسنی ءَ پاکستان نیوی ءِ بیس، دالبندین ءَ فرنٹیئر کور ءِ بنجل، کلات ءَ کمانڈنٹ میس ءُ تمپ پل آباد ءُ رودبن ءَ پوجی بنجل پدائین اُرشاں نشانگ کتگ انت-
آپریشن ھیروپ نا ایوک ءَ بلوچ جنگ ءِ ھترناکیں اُرش بیتگ بلکیں پاکستان ءُ بلوچ راجی ادارھانی میان ءَ جنگ ءَ اے اولی بھر بیتگ کہ بلوچ زالبول جنگ ءِ میدان ءَ دیم پہ دیمی جنگ ءَ بھر اش زرتگ – بلوچ لبریشن آرمی ءِ اے پیسلہ ءَ بلوچ آجوئی ءِ جنگ ءِ اُنڈالانی سان دور دور ءَ گندگ بوگ ءَ انت-
بلوچستان ءَ آپریشن ھیروپ ءِ ھترناکیں اُرشانی درچ برجاہ انت – بلے آپریشن ھیروپ ءِ دومی بھر ءِ ترندی اے پدراھی ءَ کنت اے گامگیج بلوچ انسرجنسی ءِ پدریچ ءَ مٹ کنگ ءِ کرد ءَ پیلو کنت ءُ جنگ ءِ آجوئی ءَ سلاہ بندیں پِڑ ءَ ترند آرگ ءِ سبب جوڑ بوت کنت-