آپریشن ھیروپ دومی بھر: بی ایل اے ءَ پسنی ءَ ھواریں فدائینیں مرد ءُ زالانی اکس شنگ کتگ انت

بلوچستان ءَ بلوچ لبریشن آرمی ءِ نیمگ ءَ برجاھیں آپریشن ھیروپ ءِ دومی بھر ءَ ھواریں دو فدائین باسکانی اکس ماں آفیشل چینل ھکل ءَ شنگ کنگ بیتگ انت-

بی ایل اے ءَ دوئیں اکسانی پجار مرد ءُ زال ءِ نام ءَ کتگ انت کہ آیاں پسنی ءَ یکجاہ ءَ فدائین کتگ-

آفیشل چینل ھکل ءَ شنگ بیتگیں درشان ءَ دوئین مرد ءُ زالانی پجار یاسمہ بلوچ پنام ءِ زرینہ ءُ آئی ءِ لوگ واجہ وسیم پنام ءِ زربار ءِ نام ءَ کتگ انت کہ ھردوک الندور بلیدہ ءُ کلھدر زامران ءِ نندوک انت-

بی ایل اے ءِ رد ءَ یاسمہ 14 جنوری 1997 ءَ الندور بلیدہ ودی بیتگ ءُ 2022 ءَ بلوچ لبریشن آرمی ءِ مجید بریگیڈ ءَ ھوار بیتگ – وسیم 27 اپریل 1992 کلھدر زامران ءَ ودی بیتگ ءُ 2014 ءَ زرمبشت ءَ ھوار بیتگ ءُ 2022 ءَ مجید بریگیڈ ءِ بھر جوڑ بیتگ-

آئی ءَ گوشتگ آیاں یکجاہ ءَ زند گوازینتگ ءُ ایشی ءَ پیش یکجاہ ءَ سنگر پھریز اتگ ءُ یاسمہ ءُ وسیم بلوچ مرد ءُ زال بیتگ انت آیاں پسنی ءَ زورگریں لشکر ءِ بنجل ءَ یکجاہ ءَ وتی جان ندر کتگ –

آئی ءَ گوشتگ آیانی کسہ تھنا ایوک ءَ شھیدی نہ انت بلکیں ھمے ساھت ءَ کہ زاتی زند ءُ راجی پرز سرجم ءَ یکجاہ ءَ بوتیں پد ءَ آیانی سیادی اَزم ءُ گھگیری ءِ چیدگ جوڑ بیتگ –

آئی ءَ گوشتگ اے دوئین فدائین یکجاھی ءَ بندوک بیتگ انت آیانی ھواریں پیسلہ سِتک بیتگ کہ آ وتی سرڈگار ءِ آجوئی ءِ واستا درستاں کربان کن انت کہ آئی ءِ پریچ ءَ ماتیِں سرڈگار وت کنت-

زانگ بہ بیت ایشی ءَ بلوچ لبریشن آرمی ءَ گوادر، نوشکی ءَ زالبولیں فدائین ءُ پسنی ءَ کماش ءُ دگہ یک ورنایے ءِ اکس شنگ کتگ انت –

گوستگیں سَے روچاں بندات بوتگیں اُرش کہ آئی ءِ نام بی ایل اے ءَ ھیروپ ءِ دومی بھر داتگ ات آ انگت ءَ بازیں جاھاں برجاھی ءِ اھوال آیگ ءَ انت ءُ دومی نیمگ ءَ سرکار ءِ نیمگ ءَ سرجمیں بلوچستان ءَ انٹرنیٹ سروس بند کنگ ءُ دفعہ 144 جنگ بیتگ –