بی وائی سی ءِ رد ءَ بلوچستان یک مزنیں بندیگ جاہ ءُ یک بلاھیں ڈیتھ سیل ءِ تہ ءَ بدل بوتگ ۔
بلوچ یکجھتی کمیٹی ”بی وائی سی “ ءَ بلوچستان ءِ تہ ءَ سال 2025 ءِ میان ءَ انسانی ھکانی جاورھالانی درگت ءَ وتی ھمک سالی رپورٹ ءِ شنگ کنان ءَ گوشتگ کہ بلوچستان ءِ تہ ءَ زورانسری آوار جنی ، درکانودی کشت ءُ کوش ءُ ریاستی زوراکیانی تہ ءَ سک باز گیشی اتکگ ۔
پریس کانپرنس ءَ تران کنان ءَ بی وائی سی ءِ رھشوناں گوشتگ کہ اے رپورٹ بلوچستان ءَ برجاھیں زوراکیانی سرجمیں اکس ءَ پیش نہ دار ایت بلکنہ اے بس ” ٹپ آف دی آئس برگ “ انت کہ بلوچستان انسانی ھکانی نگیگیں جاورھالانی سرا چمشانک دیگ ءَ بس انت ۔
آیانی رد ءَ بلوچستان یک مزنیں بندیگ جاہ ءُ یک بلاھیں ڈیت سیل ءِ تہ ءَ بدل بوتگ ۔
بی وائی سی ءِ ھمک سالی رپورٹ ءِ رد ءَ بلوچستان ءَ سال 2025 ءَ 1223 مردمانی زورانسری آوارجنی ءِ کیس نبشتہ کنگ بوتگ ، کہ آیانی تہ ءَ 348 مردم یل کنگ بوتگ انت وھدیکہ 832 ھنگت بیگواہ انت ، کہ آیانی تہ ءَ 75 کسانسال ءُ ھژدہ زالبول ھوار انت ، درساں گیشتر کیس کیچ ءِ دمگ ءَ نبشتہ کنگ بوتگ کہ اودا آوارجنی ءِ کچ 339 انت ۔
بی وائی سی ءِ رد ءَ گوستگیں سال ءَ 188 مردم درکانودی کشگ بوتگ ، کہ آیانی تہ ءَ 75 مردم ریاست ءِ نیمگ بلوچستان ءَ برجاھیں بجن ءُ چگل دیگ ءِ پالیسی ءِ رد ءَ کشگ بوتگ انت ، ءُ مکران ءُ آواران اے وئیلاں گیشتر سانمند بوتگ ۔
رپورٹ ءِ رد ءَ سال 2025 ءَ بلوچستان ءَ ھمک روچ مزنیں کچے ءَ لشکر کشی کنگ بوتگ کہ چریشی ءَ دمگی مھلوک ، زالبول ءُ زھگاں ھوار لس مردم سانمند بوتگ انت ، ھزدار ءِ دمگ زھری ءَ برزی ارشاں 20 مردم نمیرانی ءِ ھال ھم اتکگ ۔
بی وائی سی ءِ رد ءَ سرجمیں سال ءَ اے زورانسری آوار جنیانی بگیری ءَ 122 ءَ گیش ایمنیں زھرشانی کنگ بوتگ انت کہ آیانی تہ ءَ کساس 39 زھرشانی پہ زور درگان درگان کنگ بوتگ انت وھدیکہ 400 ءَ گیش درنگاز کنوک دزگیر ءُ بازینے زدگ کنگ بوتگ انت ۔
گل ءِ رد ءَ بلوچستان ءَ کانودی ترام انسانی ھکانی باسک، سیاسی باسک لس مھلوک ءِ بگیری ءَ سلاھے ءِ دروشم ءَ کارمرز کنگ بوگ ءَ انت ءُ انسداد دھشتگردی ءِ کانود ، تھری ایم پی او ءُ سیکشن 144 ءِ رد ءَ ایمنیں توار ایرموش کنگ بوگ ءَ انت ۔ ۔
بی وائی سی ءِ رد ءَ آیانی پنچ رھشون کہ آیانی تہ ءَ گل ءِ بنجاھی آرگنائزر ڈاکٹر ماھرنگ بلوچ ھم ھوار انت تنی وھدی بندیگ انت وھدیکہ ایندگہ باسک ترسینگ بوگ ءَ انت ۔
پریس کانپرنس ءِ گڈسر ءَ بی وائی سی ءَ گوں اھوالکاراں لوٹ کتگ کہ بلوچستان ءِ انسانی ھکانی جاورھالاں شریں وڈی ءَ پیش بہ دار انت ءُ ایردستیں راج ءِ توار جوڈ بہ بنت ۔