گوادر، ھاران ءُ شال ءَ دگہ پنچ ورنا پاکستانی پوج ءِ دست ءَ بیگواہ کنگ بیتگ اَنت

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت- گوادر ءِ دمگ جیونی، ھاران ءُ شال ءِ سریاب دگ ءَ پنچ ورنا پاکستانی پوج ءَ بیگواہ کتگ اَنت-

بیگواہ کنگ بیتگینانی تہ ءَ بالاچ ء محمد حسن ءُ احسان ء محمد حسن، کہ فیڈرل اردو یونیورسٹی کراچی ءَ گریجویٹ ءِ کتگ، بیست دو جنوری ءَ پاکستانی پوج ء آیانی لوگاں بیڑبرتگ زورانسری بیگواہ کتگ اَنت-

اشی ءَ اَبید حافظ نزیر احمد لھڑی ء سنجر خان لھڑی کہ یک سرکاری کاردارے ھمے سال ءِ یک جنوری ءَ چہ سریاب دگ شال ءَ آئی ءِ لوگ ءَ آوار جتگ ءُ بیگواہ کتگ-

ھمے وڑ ھاران ءَ دو ورنا زورانسری بیگواھی ءِ ھال دیم ءَ اتکگ- دمگی اِھوالکار ءُ کھول ءِ رِد ءَ دوئیں ورنا پاکستانی پوج ءَ آوار جتگ ءُ ناشناسیں جاھے ءَ برتگ اَنت-

بیگواہ کنگ بیتگیں ورنا ءِ پجّار عبداللہ ء حفیظ اللہ سیاہ پاد ءُ فرھاد ء احمد بلوچ نام ءَ چہ بیتگ اَنت-

کھول ءِ رِد ءَ عبداللہ ھژدہ جنوری ءِ شپ ءَ آئی ءِ لوگ سر ءَ بیڑ میان ءَ آوار جتگ – کھول ءِ گوشگ اِنت کہ پوج ءِ کارندہ بید ورانٹ ءَ لوگ ءَ پُترتگ اَنت ءُ ورنا وتی ھمراھی ءَ برتگ اَنت، چریشی ءَ پد آیانی ھچ وڑیں ھال نیست-

دومی نیمگ ءَ فرھاد ء احمد بلوچ ءِ کھول گوشگ اِنت کہ آ چہ ھاران شھر ءِ دمگ رب پٹ جوژان ءَ آوار جتگ- چمّگدانی رِد ءَ آ یک پاکستانی پوج ءِ گاڑی ءَ نادینتگ ءُ برتگ، بلے دزگیری ءِ سوب یا ھند ءِ درگت ءَ ھچ وڑیں سرپدی دیگ نہ بیتگ-

کھول ءَ لوٹ کتگ کہ بیگواہ کنگ بیتگیں مردماں زوت دیم ءَ بیار اِت-