بلوچستان ءَ برپگواری، دگ بند، سِی سال ءِ سارتی ءِ پدرند پروشگ بیتگ انت

بلوچستان ءِ جتا جتائیں جاھاں گوستگیں روچاں بیتگیں برپگواریانی سبب ءَ سارتی زور اچانگی گیش بوتگ-

شال ءُ بلوچستان ءِ گیشتریں دمگ اے وھد ءَ ترندیں سارتی ءِ آماچ انت کہ اود ءَ گرم ءِ زور پروشتگ ءُ جھلاد بوتگ۔ گوستگیں روچ ءَ ھور ءُ برپگواری ءَ پد بیگاہ ءَ ٹنٹین گوات ءَ کَشگ بندات کتگ-

ترندیں سارتی ءِ سبب ءَ سڑک ءُ پچیں دمگاں آپ برپ بوتگ انت ءُ لوگانی ٹینکی ءُ نلاں ھم آپ برپ بوتگ انت کہ ایشی ءِ سبب ءَ شھری آپ ءِ گرگ ءَ سک باز مشکلانی آماچی انت۔

زانتکارانی رد ءَ انوگیں سارتی ءَ بلوچستان ءَ گوستگیں سی سالانی ریکارڈ پروشتگ۔ گوستگیں شپ ءَ درجہ حرارت منفی 13 ڈگری سینٹی گریڈ ءَ سر بوتگ ، وھدے کہ روچ ءِ تہ ءَ درجہ حرارت منفی 9 ءُ سارتی لیکگ منفی 12 ڈگری بوتگ ۔

شال، کلات، مستونگ، سوراب، زیارت، کان مھترزئی، ٹوبا کاکڑی ءُ ٹوبا اچکزئی ءَ ھوار میانجی ءُ رودراتکی بلوچستان ءِ بازیں دمگ سکا سارتی ءِ دَرچ ءَ زانگ بنت۔

ترنیں ٹنٹیں سائبیرین گوات ءِ سبب ءَ اے دمگاں مھلوک ءِ ھمک روچی ءِ زند سکا سانمند بوتگ۔ تیل ءِ واکدار ءِ رد ءَ کمی ءِ ھمراھی ءَ گیس ءُ بجلی ءِ بند کنگ ءَ مھلوک ءِ جیڑہ گیش بوتگ انت۔

بلوچستان ءِ رودراتکی برزی دمگاں سکیں برپگواری ءِ سبب ءَ شال ءُ زیارت ءِ شھدگ ءَ روگ ءَ بوتگیں بازیں کچے ءَ سیل ءُ سواد کنوکیں مھلوک شال ءُ زیارت ءِ شھدگ ءِ سر ءَ برپگواری ءِ سبب ءَ مھتل بیتگ انت ءُ چمن ءُ آئی ءِ کش ءُ گوری دمگاں ھم بازیں گاڑیانی مھتل بوگ ءِ ھال انت-

ھالانی رد ءَ این 50 شھدگ ءِ جتا جتائیں جاھاں ٹریفک سکا سانمند بوتگ کہ ایشی ءِ تہ ءَ کان مھترزئی، خانوزئی ءُ مسلم باغ ھوار اَنت۔ این – 50 شھدگ ءَ نُھ جتا جتائیں وئیلاں 27 مردم ٹپی بوتگ انت-

ایشی ءَ ابید کوژک ٹاپ ءَ سکیں ٹنٹیں گوات ءِ سبب ءَ این 25 چمن شال کراچی شھدگ ءِ سر ءَ درجہ حرارت منفی 12 ڈگری سینٹی گریڈ ءَ چہ کم بوتگ وھدے کہ شیلاباگ ءِ نزیک ءَ چہ رھادگ بوھگ ءِ سبب ءَ بازیں گاڑیاں ٹکر وارتگ ایشی ءِ آسر ءَ دو مردم بیران ءُ ھپت ٹپی بوتگ انت۔