ایمان مزاری اسلام آباد ءِ سرینا چوک انڈر پاس ءِ نزیک ءَ گاڑی ءِ اوشتارینگ ءَ پد دزگیر کنگ بوتگ۔ آ ءُ ھادی علی چٹھا چہ اسلام آباد ھائی کورٹ بار ءَ دمگی آمید گس ءَ روگ ءَ بیتگ۔
اے دوئیں وکیل اسلام آباد ہائی کورٹ بار ایسوسی ایشن ءِ وین ءِ تہ ءَ بوتگ انت۔ ایشانی ھمراہ اسلام آباد ہائی کورٹ ءِ بار ءِ سدر واجد گیلانی ءُ منظور ججہ ھم بوتگ انت۔
یات دارگ بہ بیت کہ جھیڑوی ٹویٹ کیس ءِ تہ ءَ اسلام آباد ہائی کورٹ ءِ نیمگ ءَ چہ داتگیں نبشتھی پیسلہ ءِ تہ ءَ ٹرائل کورٹ ءِ پرمان رَد لیکگ بوتگ ۔ پیسلہ ءِ تہ ءَ گشگ بوتگ انوگیں کیس ءِ تہ ءَ ایمان مزاری ءُ ہادی علی چٹھا دزگیر کنگ مہ بنت۔
پیسلہ ءِ رد ءَ ایمان مزاری ءُ ھادی علی چٹھا ءَ 4 روچ ءِ وھد دیگ بیت کہ آ گواھانی کراس انکوائری ءَ بہ کن اَنت۔ اگاں آ ٹرائل کورٹ ءِ دیم ءَ پیش نہ بنت گڑا اے پرمان ھلاس بوتگیں لیکگ بیت۔
زانگ بہ بیت کہ پاکستان ءَ انسانی ھکانی لگتمالی ءِ ھلاپ ءَ توار چست کنگ ءَ ایمان مزاری ءُ ھادی علی چٹھا پیش پیش بوتگ اَنت۔ ایشاں بلوچستان ءَ چہ بیگواھیں مردمانی کھول ءُ بلوچ یکجھتی کمیٹی ءِ سروکانی کیس ھم پد ءُ رند کتگ اَنت۔
انسانی ھکانی گلانی ھمراھی ءَ بلوچ سیاسی ٹولی ءُ بلوچستان ءَ چہ بیگواھیں مردمانی سیاد ءُ وارساں ھم ایمان مزاری ءِ ھلاپ ءَ برجاھیں ارزی ءِ سر ءَ پدردی درشان کتگ۔
اے پھناتانی گشگ انت کہ ایمان مزاری ءَ بلوچستان ءَ برجمیں زورانسری بیگواہ کنگ ءِ ھلاپ ءَ توار چست کنگ ءِ سبب ءَ نشانگ جوڑ کنگ بوھگ ءَ انت۔
بلوچ کھولاں گْوشتگ کہ پاکستان ءَ ھرکس بلوچ ھک، دگہ راجانی ھک یا کانود ءِ ھاکمی ءُ آئین ءِ سر ءَ گپ جنت آئی ءَ گدار گْوش اَنت۔
ایشانی رد ءَ اے گپ نوکیں گپے نہ اِنت بلے پاکستان ءِ تہ ءَ ھما زورانسری تاکتانی مزنیں راجدپترے ھست کہ ایشاں ایماندار ءُ دلیریں مردماں گدار اش گوشتگ۔ مرچی ھمے درچ ءِ چیر ءَ چندے زوراکیں مردمانی چماں ملک ءِ مزنیں آبادی یے گدار گشگ بوھگ ءَ اِنت۔