بلوچ یکجھتی کمیٹی بلوچستان ءَ برجاہ زورانسری آوار جنی ءُ درکانودی کوش ءِ دْرچ ءَ تُرندیں لبزاں ایر جن ایں- انّگیں روچاں کیچ ءُ مستونگ ءَ بیتگیں دو جتاجتائیں وئیلاں دو بلوچ ورنایاں زورانسری بیگواھی ءَ پد کشتگ اَنت کہ انسانی ھکانی ءُ میان اُستمانی کانود ءِ تچکی ءَ ھلاپ ورزی اِنت-
بی وائی سی ءِ گوشگ اِنت کہ بیست یک جنوری 2025 نومان ء ھیدر، جھمنند مند، کیچ پاکستانی پوج ءَ آوار جتگ ءُ بیگواہ کتگ، پد ءَ آئی ءِ تیرسُپتگیں لاش تمپ ءِ دمگ ءَ دزکپتگ-
کھول ءِ رِد ءَ نومان نوزدہ نومبر 2025 ءَ یک پکنکے جاھے ءَ پاکستانی پوج ءُ فرنٹیئر کانسٹیبلری ءَ درکانودی آوار جتگ اَنت- اے کاروائی ءِ میان ءَ یک سنگتے اسماعیل جاہ پہ جاھی درکانودی کشتگ – نومان کساس دو ماہ ءَ تاں زورانسری آوار جنی ءِ نشانگ کتگ ءُ اے میان ءَ آئی ءِ درگت ءَ ھچ وڑیں سرپدی دیگ نہ بیتگ-
دمگی ھیڈکوارٹر نادُراھجاہ ءَ پجّار ءَ پد نومان بلوچ ءِ لاش کھول ءِ دست ءَ داتگ، کہ آ سک لَٹ ءُ کُٹ ءُ تیرانی تچکیں نشانگ ھست بیتگ اَنت، کہ دراجیں مدتے ءَ درکانودی آوار جنگ ءُ درکانودی کوش ءِ تچکیں منانک بیتگ اَنت-
دیمتر ءَ گوشتگ کہ نوزدہ جنوری 2026 ءَ عبدالمطلب ء عبدالعزیز، جھمنند کلی کمالو، سریاب شال مستونگ ءِ دمگ دشت ءَ یک دروگیں میڑے ءَ کُشتگ – آئی ءِ لاش بیست جنوری 2026 ءَ کھول ءِ دست ءَ داتگ اَنت-
چمّگدانی رِد ءَ عبدالمطلب یازدہ جولائی 2025 ءِ شپ ءِ دو ءَ آئی ءِ لوگ ءَ چہ کاؤنٹر ٹیررازم ڈیپارنمنٹ ءُ چیریں ادارھانی کارندھاں سادھیں پوشاکاں بید چُشیں وارنٹ ءَ آوار جتگ – آ شش ماہ ءَ چہ گیش درکانودی بندیگ بیتگ- نوزدہ جنوری 2026 ءَ آ مستونگ دشت ءَ دروگیں میڑے ءَ کُشتگ – آئی ءِ لاش سر ءَ ھم سک لَٹ ءُ کُٹانی نشان ھست بیتگ اَنت-
بلوچ یکجھتی کمیٹی ءَ تچک کتگ کہ اے وئیل بلوچستان ءَ برجاہ ریاستی زوراک، زورانسری آوار جنی ، درکانودی کوش ءُ سرجمی ءَ جتائیں دْرچے- لس شھریاں، نودربر ءُ ورنایاں نشانگ کنگ سرجمیں چاگرد ءَ تُرس ءُ تُرندیں نپسیاتی نادُراھی ءِ دیمپانی کنگ ءَ اَنت-
آئی ءَ گوشتگ کہ ما لوٹ کن ایں کہ نومان بلوچ ءُ عبدالمطلب بلوچ ءِ کوش ءِ پلگاریں پٹ ءُ پول کنگ بہ بیت، بلوچستان ءَ زورانسری آوار جنی ءُ درکانودی کوش ءِ دْرچ زوت بند کنگ بہ بیت، اکوام متھدہ ءُ دگہ میان استمانی انسانی ھکانی ادارہ اے سنگین ءِ ھلاپ ورزی ءَ زوت گامگیج بزور اَنت –