تربت: گوستگیں شپ ءَ علی فقیر سنگھور ءِ سر ءَ پوج ءِ بیڑ، لوگ ءِ سامان پُرشت ءُ پروش، زھگ ءُ زالبول لٹ شاپ

گوستگیں شپ ءَ 2بج ءِ نزیک ءَ پاکستانی لشکر ءَ تربت ءِ دمگ گوگدان ءَ علی فقیر سنگھور ءِ لوگ ءِ سر ءَ اُرش کتگ ، بیڑ ءِ وھد ءَ کارندھاں لوگ ءِ جتا جتائیں کوٹیانی دروازگ پروشتگ انت ، الماری پروشتگ اَنت ءُ آھانی تہ ءَ ایریں سامان شنگ ءُ تالان کتگ اَنت ءُ جنینانی موبائل چِک کتگ اَنت ۔

دمگی مردمانی رد ءَ اے بیڑ شپ ءِ دو بج ءِ نزیک ءَ کنگ بوتگ کہ ایشی ءِ تہ ءَ جنین ءُ چُک چہ واب ءَ پاد کنگ بوتگ اَنت ءُ لوگ ءِ پٹ ءُ پول کنگ بوتگ۔ لوگ ءِ مردمانی گشگ اِنت کہ اے وھد ءَ جنین آدماں گوں بے شرپیں ھبر کنگ بوتگ ءُ زھگاں چہ آھانی بابت ءَ جُست ءُ پُرس کنگ بوتگ۔

علی فقیر سنگھور ءِ کھول ءِ گشگ ءِ رد ءَ فورسز ءِ کارندھاں آئی ءِ 125 سی سی ءِ موٹر سائیکل ھم برتگ بلے اے بیڑ ءِ وھد ءَ کس دزگیر نہ بوتگ۔

یات بہ بیت کہ گوستگیں سال ءَ ڈنک ءِ دمگ ءَ آپریشن ءِ وھد ءَ فورسز ءَ علی فقیر ءِ زھگ گوں آئی ءِ دو ھمراھاں کُشتگ اَنت کہ رند ءَ یک پرکاریں سلاہ بندیں گلے ءَ آئی ءَ را باسک لیک اِتگ ءُ زمہ واری ءِ منگ ءِ جار جتگ ات۔ دمگ ءِ مردمانی گشگ ءِ رد ءَ گوستگیں شپ ءَ ارش ءِ وھد ءَ فورسز ءِ کارندھاں آئی ءِ اکس چہ کوٹی ءَ در کتگ ءُ ٹُکّر جتگ ءُ آئی ءِ سر ءَ آئل مُشتگ۔

دمگ ءِ مردم ءُ سانمندیں کھول ءِ گشگ اِنت کہ لشکر ءَ انوگیں ارش ءِ ھچ وڑیں سبب پیش نہ کتگ کہ ایشی ءَ چہ دمگ ءَ ترس ءُ بیم شنگ بوتگ۔ سانمندیں کھول ءَ اے وئیل ءِ تچکیں پٹ ءُ پول ءُ آیوکیں وھد ءَ اے وڑیں وئیلانی بند کنگ ءِ لوٹ کتگ ءُ ھاسیں رنگ ءَ زالبولانی بے شرپی بند کنگ بہ بیت-

دومی نیمگ ءَ اے وئیل ءِ سر ءَ انگت ءَ فورسز ءِ نیمگ ءَ سرکاری لیکہ درشان نہ بیتگ انت۔