بلوچ یکجھتی کمیٹی ءَ شنگ کتگیں درشان ءِ تہ ءَ گْوشتگ کہ چہ پنجگور ءَ سیادی داروکیں گریجویٹیں نودربر ءُ دکاندار زوھیب اھمد ء مھمد اعظم ریاستی چیردستی ءَ پُرکار سلاہ بند ڈیتھ اسکواڈ ءَ پیسر ءَ زورانسری بیگواہ کتگ ءُ پد بے دردی ءَ درکانودی کشتگ-
دمگی اِھوالکار ءِ رِد ءَ زوھیب اھمد 13 جنوری 2026 ءَ وشبود ءَ میونسپل کمیٹی ءِ کارگس ءَ یک انٹرویوے ءِ واستا ساڑی بیتگ ھمے میان ءَ یک اسپیت رنگیں ٹویوٹا کرولایے ءَ سوار دیم پوشیں سلاہ بندیں مردم کارگس ءِ تہ ءَ پُترتگ اَنت ءُ سر دیم تیرگواری بندات کتگ، چریشی ءِ آسر ءَ گیٹ پھاز مھمد آلم ٹپی بیتگ-
اِھوالکار ءِ رِد ءَ سلاہ بندیں مردماں زوھیب اھمد کارگس ءِ تہ ءَ گران کتگ سک لَٹ ءُ کُٹانی نشانگ کتگ ءُ پد آ زورانسری وتی ھمراھی ءَ برتگ- 14 جنوری 2026 ءَ زوھیب اھمد ءِ لاش پنجگور ءِ دمگ بونستان ءَ دزکپتگ، کہ تیر ءُ بازیں نشان بدتریں لَٹ ءُ کُٹانی نشانگ بیتگ اَنت-
درشان ءِ تہ ءَ گوشگ بوتگ کہ مزنیں کچے ءَ لشکر ءِ ساڑی بیگ ءَ اَبید، ریاستی سروکی ءَ پُرکاریں سلاہ بندیں ٹولی سرجمیں بلوچستان سر ءِ بازار کاروائی کنگ ءَ اَنت ءُ بلوچ شھریاں زورانسری آوار جنی ءُ درکانودی کوش ءِ نشانگ کنگ ءَ اَنت- زوھیب اھمد ءِ کوش بلوچستام ءَ برجاہ ریاستی زوراکی، سنگینے انسانی ھکانی ھلاپ ورزیانی درچ اِنت ءُ تچکیں مسالے-
انسانی ھکانی پارٹیاں زوھیب اھمد ءِ کوش تُرندی ءَ ایر جنان ءَ لوٹ کتگ کہ اے وئیل ءَ ھمگرنچیں مردماں پشاک بکنت ءُ آمیدگس ءَ بیار اَنت ءُ بلوچستان ءَ برجاہ زورانسری آوار جنی ءُ درکانودی کوش ءِ دْرچ ھلاس کنگ بہ بیت-