بلوچستان ءِ تیاب دپی شھر چہ ھب ءَ پاکستانی پوج ءَ دگہ یک زالبولے زورانسری آوار جنی ءِ نشانگ کتگ-
گیشیں ھالانی رِد ءَ پنجگور ءِ جھمنندیں نوروز اسلام ءِ لوگ بانُک فاطمہ پاکستانی پوج ءَ اکرام کالونی ءَ برجاہ یک لوگے ءَ چہ آوار جتگ ءُ ناشناسیں جاھے ءَ برتگ-
زانگ بہ بیت کہ زالبول ءِ لوگ واجہ نوروز اسلام اشی ءَ ساری سے رند ءَ پاکستانی پوج ءِ دست ءَ زورانسری آوار جنی ءِ نشانگ کنگ بیتگ، چریشی ءَ چہ کھول یکشل ءَ ریاستی زوراکی ءُ زھنی آزارانی دیمپان اَنت-
زانگ بہ بیت کہ 22 نومبر ءُ دسمبر 2025 ءَ ھم آواران ءِ جھمنند نسرینہ بلوچ ء دلاور ءُ ھاجرہ نامیں زالبولے چہ ھب چوکی ءَ پاکستانی پوج ءَ زورانسری بیگواہ کتگ اَنت-
دومی نیمگ ءَ بلوچ یکجھتی کمیٹی ( BYC) نیمگ ءَ چہ مرچی شنگ بیتگیں رپورٹ، سال 2025 ءِ میان ءَ بلوچستان ءِ جتاجتائیں دمگاں کم چہ کم دوازدہ بلوچ زالبول ءُ چُک زورانسری بیگواہ کتگ اَنت-
بی وائی سی رِد ءَ اے وئیل پردے یا اتپاکی نہ اِنت بلکیں یک مھکمیں ریاستی زوراکی ءَ پدر کنت، کہ زورانسری آوار جنی ءِ مچی سزا ءَ کارمرز کنگ ءَ اِنت-