کتاب ءُ استاد
نبشتہ کار: شاھد اھمد
دی بلوچستان پوسٹ
اے ھر دو تئی رھشونی ءَ کن اَنت، ترا تئی جند ءِ ءُ چاگرد ءِ بارو ءَ سرپدی دے اَنت۔ ھمے مالومات کہ ترا ھمے کتاب ءُ استاد دیگ ءَ انت اے سک ءَ زانگ لوٹ اِیت۔ وانگ ءُ زانگ ھر دو جتائیں چیز اَنت کہ چہ کتاب ءُ استاد ءَ ماں وانگجاہ ءُ وانگس ءَ دربرگ بنت اِنت۔
زند ءِ ھر پڑ ءِ کتاب ھست آ یا تئی زند ءِ کجام ھم پھنات بہ بیت بلے وھدے کہ تئی بنداتی وانگجاہ نزور بہ بیت گڑا بلاھیں جیڑھے ماں چاگرد ءَ تالان کنت۔
بُنگیجی وانگجاہ مھکم چہ مُھکم کنگ لوٹ اِیت۔ اگاں تو بلوچے ئے تئی ماتی زبان بلوچی اِنت اگاں بُنگیجی وانگجاہ ترا بلوچی بزاں ترا تئی ماتی زبان ءَ وانینگ مہ بیت گڑا آ تئی آیوکیں پدریچ ءِ واستا بلاھیں تاوانے یا سان دَور دنت۔ تو بلوچے ئے، تئی لوگ ءَ ترا تئی ماتی زبان ءَ گپ ءُ ھبر کنگ بیت اِنت بلے وانگجاہ ءَ تئی ماتی زبان ءَ گیش ترا دری زبان ءَ وانینگ بیت اِنت گڑا سبب ایش بیت کہ تئی ساچشتی ردوم نزور تَرّان بیت، آئی ءِ مجگی بُنزھی دیمروی ءَ اَبید گڑ ءُ منجانی تہ ءَ مانگیشّ اِیت۔
استاد ءُ کتاب تئی چاگرد ءَ بلاھیں کردے پیلو کن اَنت چمیشکا ایشانی گچین سکّ ءَ ھژدری اِنت، ایشانی گچین کنگ ءَ ترا گوں ھورتی ءَ زانگ ءُ چارگ لوٹ اِیت چی ءَ کہ بلوچ ءِ آیوکیں پدریچ ءِ باندات ھمے کتاب ءُ استادانی بلاھیں کردے مان اِنت۔
مئے بلوچ چاگرد ءِ تہ ءَ مات ءُ پتاں پہ وتی چُکّاں وانینگ ءَ ماں وانگجاھاں دیم وَ دے اَنت ءُ اسکول پیس ھم دیگ ءَ اَنت بلے گیشتریں مات ءُ پت بے سمائی ءِ آماچ اَنت آ بِھ وتی چُکانی ردومی ءَ نہ گند اَنت ءُ نہ زان اَنت کہ مئے چُک اود ءَ چے وانگ ءَ اَنت، ءُ چونیں کتاب وانینگ بوگ ءَ انت ءُ چونیں استاد اَنت کہ مئے چُکاں وانینگ ءَ اَنت اے بارو ءَ مات ءُ پِتاں سما نیست پرچاکہ مات ءُ پت وت بے زانتی ءِ آماچ اَنت گڑا جُست اے پاد کَیت کہ کَے پہ بلوچ ءِ آیوکیں پدریچ ءِ ھاتر ءَ جیڑ اِیت؟
وھدے کہ گونڈو دہ ءِ چکاس ءَ پاس کن اَنت گڑا آ نہ زان اَنت کہ مارا چے وانگی اِنت ءُ کجام پڑ ءَ بہ رو اِیں؟ رَند ءَ کہ ھمے چُک سما کنت ءُ یاکہ میچور بیت گڑا بندیک ءِ سر گار اِنت۔ گڑا ایشانی زمہ وار کَے اِنت؟ ھمے وانگجاہ ءِ استاد اَنت یا کہ مات ءُ پت اَنت؟
ایشی ءَ چہ اَبید نَکل کنگ رواج پیداک بیت اِنت، پد ءَ ھمے کونٹکسٹ اَنت کہ ناں سرے ھست ءُ نَیکہ بُنے۔ اسکول کنسٹرکشن شوک شوک اَنت، روڑ ءُ دگاں بچار ئے تو گُش ئے پورا اکسپورڈ شھدربرجاہ انت، بلے راستی ءَ تو تہ ءَ بچار ئے تو گُش ئے پورا اود ءَ گَھ اِتگیں ڑونڈے مُرتگ، راستی چیر اندرے ءَ گُٹگیر کُتگ پد ءَ ھر کسی چم پچ اَنت کور(کور رھدربر) اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-