میڈیکل ءِ پڑ ،جُھد ءُ ھزمت ءُ تکانسری ءِ راہ اِنت
نبشتہ کار: ھانی بلوچ
دی بلوچستان پوسٹ
میڈیکل ایوک ءَ یک نوکری یے نہ اِنت بلکیں بنی آدم ءِ ھزمت ءِ سکیں مزنیں زمہ واری یے. اے پڑ ءَ گام اِیر کنوکیں نودربر ایوک ءَ ڈاکٹرے جوڈ بوگ ءِ واھگ نہ دار ایت، بلکیں آ بنی آدم ءِ کمکار بوگ ءِ، جان ءِ پھازگ ءِ، درد ءِ کم کنگ ءِ، ءُ اوست ودی کنگ ءِ زمہ واری ءَ ھم مننیت. میڈیکل ءِ پڑ ءَ رؤوکیں نودبرے ءِ اولی زِمّہ واری دلپھکی اِنت. آئی ءَ اے زانگ لوٹ اِیت کہ اے پڑ ءِ گچین کنگ ایوک ءَ زَرّ کٹگ ءُ نامدار بوگ ءِ نام اِنت بلکیں بنی آدم ءِ ھزمت کنگ ءِ نام اِنت. دلپھکی آئی ءَ گرانیں کارانی تہ ءَ رھشونی کَنت. دومی مزنیں زِمّہ واری یکشلیں جُھد ءُ شوک اِنت، میڈیکل ءِ وانگ ءِ تہ ءَ نودربر وڑ وڑیں گرانیں جیڑہ ءُ جنجالانی آماچ بیت، پمیشکا اے جنجالانی تہ ءَ سبر کنگی اِنت، نودربر ءَ وھد ءِ پابند بوگی اِنت، گیش ءَ چہ گیش وھد گوں وانگ ءُ زانت ءَ گوازینگی اِنت، زانت ءُ زانشت ءِ کِشک ءَ رہادگ بوگی اِنت-
سُستی کَنگ، ءُ وانگ ءِ تہ ءَ کمی کنگ اے راہ ءَ بے سوبی ءِ سوب جوڑ بنت، سیمی زِمّہ واری ایش اِنت کہ نودربر ءِ تہ ءَ جْوانیں کرد ءُ اھلاک بوگ المّی اِنت، یک شوکین ءُ شَرّیں ڈاکٹرے ھما مردُم بوت کَنت کہ آ راستگْوش، نرم دل، وش اھلاک ءُ زمہ واریں مردمے بہ بیت، گوں نادراھاں ھمدردی بہ کَنت، وتی استاد ءُ رھشوناں گوں اِزّت ءِ سر ءَ پیش آیگ میڈیکل ءِ نودربرے ءِ کِرد ءِ المی ئیں بھرے. چارمی زِمّہ واری ایشی اِنت کہ نودربر ءَ وانگ ءِ وھد ءَ وتی جاندراھی ءِ ھیالداری کنگی اِنت، وت ءَ چہ ھرابیں ھیل ءُ آدت ءُ کاراں چہ رکینگی اِنت، واب سرجم کنگی اِنت، شریں وردِن ورگی اِنت، ءُ وتی مجگ چہ پریشانیاں رکینگی اِنت-
پرچکہ یک دَم بُرتگیں مجگے شوکیں وڑے ءَ کار کُت نہ کَنت، آسر ءَ ھمے گُشاں کہ میڈیکل ءِ پڑ ءَ روگ یک بلاھیں شرپے، ایشی ءَ ابید یک چکاسے ھم، ھما نودربر کہ وتی زِمّہ واریاں سرپد بیت ءُ گوں دل ءَ جُھد کَنت، آ ایوک ءَ یک سوبمندیں ڈاکٹرے جوڑ نہ بیت، بلکیں چاگِرد ءِ واست ءَ یک رھمتے ءِ دروشم ءَ دیم ءَ کیت، میڈیکل ءِ پڑ ءَ ایوک ءَ مجگ نہ لوٹ اِیت، دل ءَ ھَم لوٹ اِیت.
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-