بلوچستان ءِ تیاب دپی شھر گوادر ءِ دمگ جیونی ءَ زورانسری آوار جنی ءِ دْرچ یکشل ءَ برجاہ ءَ اِنت، نوکیں ھالانی رِد ءَ دسمبر 2025 ءُ جنوری 2026 ءِ میان ءَ کم چہ کم چار ورنائیں ماھگیر جتاجتائیں ھنداں چہ پاکستانی پوج ءِ زورانسری بیگواہ کتگ اَنت-
دزکپتگیں ھالانی رِد ءَ بیست دو سالی ئیں ماھگیر اسراج ء نور بکش جھمنند پانوان جیونی، پنچ جنوری 2026 ءِ شپ ءِ کساس سے ءَ آئی ءِ لوگ ءَ چہ پاکستانی پوج ءَ آوار جتگ ءُ ناشناسیں جاھے ءَ برتگ-
ھمے وڑ بیست پنچ سالی ئیں ماھگیر جھانگیر ء مراد بلوچ بیست ھپت دسمبر 2025 ءِ نیمروچ دوازدہ ءَ چہ جیونی ءَ یک ھوٹلے ءَ( گوادر ھوٹل ) پاکستانی پوج ءَ زورانسری بیگواہ کتگ-
ھمے وڑ ھژدہ سالی ئیں شمس الدین ء رستم بلوچ بیست پنچ دسمبر 2025 ءِ سُھب ءَ دہ ءَ آئی ایس آئی ءِ کارگس، چہ گوادر ءَ آوار جنگ ءَ پد بیگواہ کتگ- وھدے بیست پنچ سالی ئیں شبیر ء عبداللہ پنچ جنوری 2026 ءِ شپ دوازدہ ءَ چہ جیونی گوادر ءَ آوار جنگ ءُ بیگواہ کنگ بیتگ، کہ ایف سی ءُ آئی ایس آئی ءِ کارندھاں ھمگرنچ بیگ ءِ ھال اِنت-
زانگ بہ بیت کہ سرجمیں زورانسری بیگواھیں مردمانی سیادی یکیں دمگ پانوان ، جیونی ءَ اِنت ءُ درست ماھگیر اَنت- دمگی مردمانی رِد ءَ ماھگیر پڑ مردم پیسر ءَ چہ بدھالی ءِ آماچ اَنت، وھدے کہ زورانسری آوار جنیاں دمگ ءَ تُرس ءُ بیم ودی کنگ ء گیش سنگین جوڑ کتگ-
انسانی ھکانی کارکنان ءَ اکوام متھدہ ، ایمنسٹی انٹرنیشنل ءُ دگہ امیان استمانی ادارھاں چہ دزبندی کتگ کہ آ بلوچستان ءَ برجاہ زورانسری آوار جنی ءَ زوت گامگیج بزور اَنت ءُ پاکستان ءِ سر ءَ زور بدے اَنت کہ آ میان استمانی انسانی ھکانی کانود ءِ پاسداری ءَ بکنت-