ڈیھ ءَ ناشرکاری زھرشانی کنوکانی سزا تھنا مَرگ انت- ایرانی پراسیکیوٹر جنرل

بیست ءُ ھشت دسمبر ءَ بندات بیتگیں زھرشانی ءَ دراھیں ڈیھ پوناتگ ءُ چریشی ءَ ایران ءِ پراسیکیوٹر جنرل ءَ زھرشانی کنوکانی ھلاپ ءَ کاروائی ترند کنگ ءِ کڈنی کتگ-

ایران ءِ پراسیکیوٹر جنرل محمد موھدی آزاد ءَ دمگی آمید گس جوڑ کنگ ءِ پرمان داتگ کہ ملک ءَ برجاھیں آشوب ءِ وھد ءَ دزگیریں مردمانی سر ءَ کارروائی ءَ را ترند کنگ بہ بیت ءُُ سزا ءِ سر ءَ پاھو ءِ سزا دیگ بہ بیت۔

دہ جنوری ءَ آئی آر آئی بی چینل ءِ سرکاری ٹیلی گرام ءِ رد ءَ موگدی آزاد ءَ سرجمیں ملک ءَ پراسیکیوٹرز ءِ کارگساں کڈنی کتگ کہ آ چار ءُ تپاس ءُ دیر ءَ بید جرم ءِ درج کنگ ءُ بنداتی گوشدارگ ءِ تیاری ءَ بہ کن انت۔

ھمک کرپشن ءِ ھلاپ ءَ لوٹ یک انت ۔ کسے ءَ کرپٹیں مردمانی کمک کتگ ءُ ناشرکاراں راجمانی جان سلامتی ءُ مال ءُ مڈی ءَ تاوان داتگ یا سیکیورٹی ءَ سلاہ چست کتگ ءُ شھریانی تہ ءَ ترس ءُ بیم ءِ شنگ ءُ تالان کتگ۔ اے گوں ھدا ءِ جنگ اِنت ءُ ایشی ءِ سزا مرگ اِنت۔

آئی ءَ گوشتگ کہ ھما مردم ٹاہ مہ کن انت پرچا کہ آھاں گوں دگا کنگ بوتگ۔ پرچا کہ آ باز پیسر ءَ دژمن ءِ نیتانی بابت ءَ سرپد کنگ بوتگ اَنت۔

آئی ءَ وتی پیسلہ ءِ تہ ءَ گشتگ کہ آھانی ھلاپ ءَ کارروائی ءِ تہ ءَ نرمی، ھمدردی ءُ ھچ وڑیں گنجائش نیست۔ آئی ءَ سرکاری کارندہ ءُ سوشل میڈیا ءِ کارکناں ھم ھشدار داتگ کہ آ وتی بیاناں گوں دلگوش بہ بنت۔

ایران ءِ واکداراں اے زھرشانی کنوکاں کرپٹ ءُ ناشرکاریں مھلوک گْوشتگ۔

دسمبر ءَ بندات بوتگیں اے زھرشانی سرجمیں ملک ءَ شنگ ءُ تالان بوتگ ءُ 8 جنوری ءَ چہ ایران ءِ پیسریگیں ولی اھد رضا پھلوی ءَ چہ مردماں لوگاں درکپگ ءِ لوٹ کنگ ءَ پد گیش بوتگ۔

دومی نیمگ ءَ ایران ءَ بھتام جتگ کہ اے ویلانی پژدر ءَ امریکہ ھوار انت ءُ امریکہ ڈیھ ءِ تھی جیڑھاں دزمانجنی مہ کنت-

ایران ءَ گوشتگ اگاں امریکہ ءَ ڈیھ ءِ پوجداری بنجلانی سر ءَ اُرش کت گڑا ایران اسرائیل ءُ امریکہ ءِ نزیکیں بنجلاں نشانگ کنت-