ھمگرنچیں گچینی پھزداری یونٹ
ٹی بی پی شونگال
پاکستان ءِ وزیر داکلہ محسن نقوی ءَ چین ءِ تر ءُ تاب ءِ وھد ءَ بیجنگ ءَ وزارتِ عوامی سیکیورٹی ءِ ھیڈکوارٹر ءَ چین ءِ پبلک سیکیورٹی ءِ وزیر وانگ ژیاؤ ھونگ ءَ گوں گند ءُ نند ءَ چین ءُ پاکستان ءِ ھمگرنچیں گچینی سیکیورٹی یونٹ ءِ برجم کنگ ءِ پیسلہ کنگ بیتگ دانکہ پاکستان ءَ چینی شھریانی سیکیورٹی ءِ گامگیج جوانتر کنگ بہ بیت ءُ اے مول ءُ مراد ءِ واستا پاکستان ءِ کارندھانی ھیلکاری ءُ سنچداری ءِ گیش کنگ ءَ ھواریں گامگیج زیرگ بہ بیت-
پاکستان ءُ چین ءِ ھمگرنچیں گچینی سیکیورٹی یونٹ ءِ برجم کنگ ءِ مول ءُ مراد ایش انت کہ پاکستان ءُ گچینی رنگ ءَ بلوچستان ءَ چین ءِ کھن جن ءُ دگہ کارداری پریاماں بندوکیں چینی انجینئرز ءُ تکنیکی زانتکارانی پھریزگ سرجمی بہ بیت انت- اے زانگ بہ بیت کہ چینی شھری ءُ انجینئرز کراچی، ھیبرپکتونکواہ ءُ بلوچستان ءَ بازیں رنداں ھترناکیں اُرشانی نشانگ کنگ بیتگ انت- پاکستان ءِ نیشنل کاؤنٹر ٹیررازم اتھارٹی ءِ ڈیٹا ءِ رد ءَ 2021 ءِ دسمبر ءَ داں 2024 ءَ جتا جتائیں اُرشاں چین ءِ 20 شھری کشگ ءُ 34 زدگ بیتگ انت-
چہ گوستگیں سالاں بلوچستان ءَ چین ءِ گزرانکی ءُ لشکری منسوبگاں ھمگرنچیں چینی انجینئرز ءُ تکنیکی زانتکارانی سر ءَ اُرش گیش بوتگ انت – بلوچ لبریشن آرمی ءِ مجید بریگیڈ ءِ فدائی کراچی ءُ بلوچستان ءِ جتا جتائیں جاھاں چینی شھریانی سر ءَ ھونریچیں اُرش اش کتگ – اکتوبر 2024 ءَ کراچی انٹرنیشنل ایئرپورٹ ءَ مجید بریگیڈ ءِ فدائی اُرش ءَ سَے چینی انجینئر مرتگ انت ءُ بازینے زدگ بیتگ انت ھمے وڑ بلوچستان لبریشن فرنٹ ءَ سدو آپریشنل بٹالین نومبر 2025 ءَ نوکنڈی ءَ ریکوڈک ءُ سیندک ءِ انجینئرانی سر ءَ ھترناکیں اُرشے کتگ-
چین ءَ پاکستان، گچینء بلوچستان ءَ وتی راہ ءِ ھمواری منسوبگانی برجم کنگ ءَ سنگینیں سیکیورٹی ءِ آماچ انت، ایشانی دور کنگ ءَ پاکستان ءُ چین ءِ ھمگرنچیں سیکیورٹی یونٹ ءِ برجم کنگ بیتگ- بلے گوستگیں سال ءَ پاکستان سیکیورٹی پورسز ءِ نیمگ ءَ بلوچستان ءَ 90 ھزار انٹیلیجنس بیسڈ آپریشنز کنگ ءَ ابید بلوچ آجوئی لوٹوکیں سلاہ بندیں گلانی اُرشانی توک ءَ ترندی اتکگ ءُ ایشی ءِ توک ءَ ھچ شک نیست کہ ھمگرنچیں گچینی سیکیورٹی یونٹ ءِ دیم ءَ آیگ ءَ پد ھم چین ءِ لٹ ءُ پلی نامینگ ءِ منسوبگانی سر ءَ اُرش برجاہ بنت-