بلوچستان ءِ دمگ پنجگور ءُ کیچ ءَ پاکستانی پوج ءَ دو مردم آوار جتگ ءُ بیگواہ کتگ اَنت-
دمگی اِھوالکار ءِ رِد ءَ بیگواہ بیتگیں مردمانی پجّار الیاس ء حاجی غلام حسین ،جھمنند پنجگور ءِ دمگ وشبود، ءُ عمر ء لیاقت گوھرام، جھمنند مند نام ءَ چہ بیتگ اَنت-
چمّگند ءُ کھول ءِ گوشگ اِنت کہ الیاس پنجگور ءِ دمگ چہ چیدگی ءَ پاکستانی پوج ءَ آوار جتگ- کھول ءِ رِد ءَ آوار جنگ ءَ پد الیاس ناشناسیں جاھے ءَ برتگ، بلے بازیں روچانی گوزگ ءَ اَبید آیانی درگت ءَ ھچ وڑیں ھال نیست-
دومی نیمگ ءَ کیچ ءِ دمگ مند، کوہ پشت ءَ شپ ءِ وھد ءَ یک بیڑے ءِ میان ءَ عمر ء لیاقت گوھرام آئی ءِ لوگ ءَ چہ آوار جتگ – کھول گوشگ اِنت کہ پوج ءِ کارندھاں لوگ ءِ پٹ ءُ پول ءَ پد عمر وتی ھمراھی ءَ برتگ، چریشی ءَ پد آ بیگواہ اِنت-
بلوچستان ءَ زورانسری آوار جنی دْرچ یکشل ءَ برجاہ ءَ اِنت- انسانی ھکانی گل ءِ رِد ءَ بلوچستان ءَ ھزارانی مردم پاکستانی پوج ءِ دست ءَ اَنت-