کیچ ءِ بنجاھی شھر چہ تربت ءَ زَر ءِ ھاتر ءَ آوار جنگ بوتگیں ورنا حسیب یاسین چہ بلیدہ ءَ یل کنگ بوتگ۔ حسیب یاسین گوستگیں ماہ ءَ اپسر ءِ دمگ ءَ چہ وتی دکان ءَ لوگ ءَ روگ ءِ وھد ءَ ناشناسیں سلاہ بندیں مردماں آوار جتگ ءُ پد ءَ آوار جنوکاں آئی ءِ یلہ کنگ ءِ ھاتر ءَ ٹوھیں کچے ءَ زَرانی لوٹ کتگ۔
تربت ءَ گوستگیں ھپتگ ءَ حسیب یاسین ءِ سلامتی ءَ یل کنگ ءِ ھاتر ءَ لس مھلوک ءَ ٹوھیں کچے ءَ زھرشانی کتگ۔ جتا جتائیں سیاسی گل، چاگردی گل ءُ شھری مھلوک ءِ نیمگ ءَ یکشلیں دیوان، زھرشانی مچی ءُ شٹر ڈاؤن ھڑتال کنگ بیتگ کہ ایشی ءِ تہ ءَ مزنیں کساسے ءَ شھریاں بھر زرتگ ءُ آوار جنگ ءِ گیش بوھوکیں وئیلانی سر ءَ سک باز جیڑہ درشان کتگ ءُ آئی ءِ زوتیں یل کنگ ءِ لوٹ کتگ۔
بنشون ءِ رد ءَ چار شمبے ءِ شپ ءَ دیر ءَ حسیب یاسین بلیدہ ءَ یل کنگ بوتگ ءُ ایشی ءَ پد آئی ءَ را اپسر ءَ وتی لوگ ءَ پہ سلامتی سر کنگ بوتگ۔
دومی نیمگ ءَ تربت ءِ دمگ ملائی بازار ءَ چہ آوار جنگ بوتگیں نامداریں ٹھیکیدار گل جان ءِ چُک شاہ نواز انگت بیگواہ اِنت۔ شاہ نواز دسمبر 2025 ءَ ملائی بازار ءَ لوگ ءَ روگ ءِ وھد ءَ ناشناسیں مردماں آوار جتگ ءُ پد ءَ دشتی بازار ءِ نزیک ءَ آئی ءِ گاڑی دزکپتگ ۔
ھالانی رد ءَ آوار جنوکاں آئی ءِ یل ءِ کنگ ءِ ھاتر ءَ بازیں کساسے ءَ زَر ھم لوٹ اِتگ بلے آئی ءِ دیم ءَ آرگ انگت ءَ سرجمی نہ بیتگ۔
راجمانی ءُ سیاسی دمگاں حسیب یاسین ءِ یل کنگ ءَ را وش آتکیں ءُ جوانیں گامگیج لیک اِتگ ءُ گْوشتگ کہ داں دگہ بیگواھیں شھری پہ سلامتی ءَ یل کنگ نہ بنت،زر ءِ ھاتر ءَ آوار جنگ ءِ ھلاپ ءَ زھرشانی ءُ راجمانی زور برجاہ بیت۔