کیچ ءَ گیش بوھوکیں بدامنی ءُ زر ءِ ھاتر ءَ آوار جنگ ءِ وئیلانی ھلاپ ءَ آل پارٹی کیچ، انجمن تاجران، ڈاکٹر ایسوسی ایشن ءُ سول سوسائٹی ءِ گلانی نیمگ ءَ ٹوھیں زھرشانی ءِ برجم دارگ بوتگ کہ چریشی ءَ سدانی کچ ءَ مردین ءُ زالبولاں بھر زرتگ۔
زھرشانی روانک چہ اپسر بازار ءَ بندات بوتگ ءُ پریس کلب ءِ درچ ءَ چہ شھر ءِ جتا جتائیں راہ ءُ دراں چہ شھید فدا چوک ءَ سر بوتگ ءُ اودا زھرشانی روانک مُچی ءِ دروشم ءَ سرجم بوتگ۔
زھرشانی مچی ءَ گوں تران کنان ءَ پیسریگیں سر وزیر بلوچستان ءُ نیشنل پارٹی ءِ سروک ڈاکٹر عبدالمالک بلوچ ءَ گْوشتگ کہ کیچ ءَ امن ءُ ایمنی ءِ جاور بے دروریں پریشانی ءِ جوڑ بوتگ اَنت۔ آئی ءَ گوشت کہ آوار جنگ بوتگیں ورنا حسیب حاجی یاسین ءُ شاہ نواز گل جان ءَ سلامتی ءَ یل کنائینگ ءَ ریاستی ادارگانی زمہ واری انت، آئی ءَ گوشت کہ یک رندے پد ءَ کیچ ءَ بدامنی ءِ نیمگ ءَ پندل جوڑ بوھگ ءَ انت البت کیچ ءِ الس اے پندلاں بے سوب کن انت۔ آئی ءَ چہ دمگدار ءَ لوٹ کتگ کہ آ وتی زمہ واریاں پیلو بہ کنت ءُ شھریاں ایمنی بہ دنت۔
ڈاکٹر عبدالمالک بلوچ ءَ گیش گوشت کہ گوستگیں یک ماھے ءَ چہ آماچیں ھاندان ءِ ھمراھی ءَ درستیں ھمگرنچیں ادارگاں گوں نزیکی کنگ بیتگ بلے ھر یک ادارگے دومی ءَ ملامت کنگ ءَ اِنت وھدے کہ الس ءِ جان ءُ مال ءِ رکھینگ ریاست ءُ آئی ءِ ادارگانی مستریں زمہ واری اِنت۔
آل پارٹیز کیچ ءِ کنوینر نواب خان شمبیزئی ءَ وتی گشتانک ءِ تہ ءَ گوشت کہ زر ءِ واسرا آوار جنگ ءِ انوگیں وئیل سک پریشان کنوک انت۔ آئی ءَ بیھار داتگ کہ اگاں آوار جنگ بوتگیں حسیب یاسین ءُ شاہ نواز گل جان زوت یل نہ بوت انت گڑا 7 جنوری ءَ شٹر ڈاؤن ھڑتال ءِ گوانک جنگ بیت۔
کیچ بار ایسوسی ایشن ءِ صدر ایڈووکیٹ سید مجید شاہ ءَ گشتگ زر ءِ ھاتر ءَ آوار جنگ ءِ وئیل ایرجنء ءِ لائک انت۔ آئی ءَ گوشت کہ کیچ بار ءَ زھرشانی ءِ درشان ءَ مرچی آمید گس ءِ کاروائی بائیکاٹ کتگ ءُ وکیل آماچیں ھاندانانی گوما سرجمیں رنگ ءَ یکجائی ءَ اوشتاتگ اَنت۔
پیسریگیں نگران وزیر ءُ شاہ کاروان ءِ سروک غفور احمد بزنجو ءَ گشتگ کہ انوگیں بدامنی ءِ وئیل مھلوک ءِ ھاتر ءَ سکیں بے ایمنی ءِ سوب جوڑ بوھگ ءَ انت ءُ ریاست ءَ شھری پھریزگی ءَ انت۔
پیسریگیں سینیٹر اسماعیل بلیدی ءَ گشتگ کہ مکران ءَ ھوار کیچ ءِ مھلوک سکیں بدامنی ءِ آماچ انت۔ کاروبار بند انت، روزگار ءِ وسیلگ کم انت ءُ نوں الس چہ زندگ بوھگ ءِ ھک ءَ ھم زبھر کنگ بوھگ ءَ انت پمیشکا سوداگر ءُ شھریاں رکھینگ بہ بیت ءُ زر ءِ واستا آوار جنگ زوت بند کنگ بہ بیت۔
زھرشانی ءِ مچی ءَ بی این پی عوامی ءِ بنجاھی نائب صدر کامریڈ ظریف زدگ، بی این پی ءِ سروک ڈاکٹر غفور بلوچ، جمیعت علماء اسلام کیچ ءِ سروک مولانا عبدالحفیظ مینگل، بنجاھی جمیعت اھل ھدیس کیچ ءِ سروک امیر مولانا سعید احمد احمد تگرانی ءَ ھم گشتانک داتگ۔
زھرشانی ءِ تہ ءَ ھزاراں مرد ءُ زالبولاں بھر زرتگ کہ آھانی تہ ءَ سیاسی گلانی سروک، سول سوسائٹی ءِ نمائندہ، پیرامیڈیکل ایسوسی ایشن، کیچ بار کونسل، بلوچستان بار کونسل ءُ مکران بار کونسل ءِ وکیل، جتا جتائیں تک ءُ پھناتاں سیادی داروکیں مردم ءُ آماچیں ھاندان ءِ مردم ھوار بیتگ اَنت۔