بلوچ یکجھتی کمیٹی ءِ بنجاھی رھشون سمی دین ءَ گشتگ کہ ریاست بلوچ راج ءَ یک راجے ءِ دروشم ءَ نہ چار ایت بلکیں یک دژمنے ءِ رنگ ءَ چار ایت، ءُ ھمے پکر بلوچستان ءَ برجاھیں سنگینیں انسانی ھکانی لگتمالیانی بنیاد انت۔ آئی ءِ رد ءَ ریاست ءِ جیڑہ نا تھنا بلوچ انسرجنسی انت، نا انسداد ناشرکاری انت، ناکہ وتگڑیں نارازءں بلوچ انت، بلکیں اسل جیڑہ بلوچ ءِ پجار ءُ ھستی انت۔
آئی ءَ گْوشتگ ھمے سوچ ءِ درچ ءَ بلوچ مردین، جنین، ورنا، پیر ءُ تاں کسانیں چُک ھم زورانسری بیگواہ کنگ یا کُشگ بیگ ءَ اَنت۔ اے بلوچ کُشگ ءِ پالیسی وت اے گپ ءَ پدر کنت کہ ریاست ءَ جیڑہ گوں بلوچ گھگیری ءَ نہ اِنت بلکیں آئی ءِ پجار ءَ گوں اِنت۔
سمی دین ءِ رد ءَ ناشرکاری ءُ انسداد ناشرکاری ءِ بیانیہ بس یک پردہ یے کہ ایشی ءِ پُشت ءَ ریاست وتی بلوچ دژمنیں پالیسیانی توجیل ءَ کنت ءُ دنیا ءِ دیم ءَ آئی ءِ توجیل کنگ ءِ کوشست ءَ کنت۔ اگاں اے کار راستی ءَ انسداد ناشرکاری ءِ تَک ءَ کپ اَنت گڑا بے گناھیں جنین آدم، لاپریں جنین آدم ءُ سیزدہ سالی زھگانی زورانسری بیگواہ کنگ کجام کانود ءُ کجام تک ءِ رد ءَ جائز بوت کنت؟
آئی ءَ گْوشتگ وھدیکہ بلوچ نسل کشی ءِ گپ بیت گُڑا ایشی ءَ دروگیں بیانیہ گْوش اَنت، اگاں چہ یک راجے ءِ واستا چہ ایشی ءَ مستریں نسل کشی چے بوت کنت کہ آئی ءِ ھلاس کنگ ءِ واستا سرجمیں سیمسراں چہ سرگوز بہ بیت ءُ مردین، جنین، پیر ءُ زھگ ءِ نیام ءَ پرک ءُ تپاوت نیست۔
سمی دین ءَ گوشت کہ دگنیا ءِ تہ ءَ سیویلائز راج دژمنی ءُ جنگ ءِ ساھت ءَ ھم زالبول ءُ چُک ءَ جتا ءُ ایمن سرپد بنت بلے بلوچ راج ءِ بد بھتی ھمیش اِنت کہ ھما ریاست ءَ آئی ءَ را دژمن لیک اِتگ آئی ءِ تہ ءَ نہ دود پشت کپتگ ءُ نہ کہ انسانیت۔ راجی ءُ میان استمانی آئین ءُ کانود نوں ایوک ءَ کاگدی ٹاپار جوڑ بوتگ انت کہ املی رد ءَ آھانی ھچ وڑیں وجود نیست۔
گڈسرا آئی ءَ چہ میان استمانی انسانی ھکانی ادارگ ءُ دودمانیں دگنیا ءَ لوٹ کرتگ کہ آ بلوچستان ءَ بلوچ راج ءِ ھلاپ ءَ برجاھیں زورانسری بیگواھی، درکانودی کشتار ءُ پالیسیانی سر ءَ زوت ءُ سنگینیں رنگے ءَ دلگوش بہ کن اَنت۔